Basale enkundleni bedubulana namaphoyisa 

Phila Luthuli

BASALE enkundleni abasolwa abathathu bedudulana ngenganono namaphoyisa.

Kulesi sigameko amaphoyisa amabili athole imihuzuko ngesikhathi egudlwa yizinhlamvu zesibhamu ekhanda.

Laba basolwa bayanyaniswa nokubulawa komseshi woKlebe okwenzeka ngoJanuary wangonyaka owedlule nokubanjwa kwezimoto zemali zemali eminyakeni eyedlule.

Ngesikhathi libulawa leli phoyisa labe liphumele isigameko sokudunwa kwemoto yemali eMtubatuba.

Esigamekweni saseReservoir Hills, ithimba elibhekela ezeziqhumane libizwe ukuba lizokhipha izinto ezithile eziyingozi emotweni, okubalwa kuzo ne-grenade kwatholakala nezibhamu ezimbili.

Ngenyanga edlule iPurpose ibike ngabasolwa ababili abadutshulwe babulawa eNhlungwane, eNanda abathinteka eqenjini lezigilamkhuba elibizwa ngeNanda West Gang.

Amaphoyisa aveze ukuthi adubule abulala abasolwa ababili kwathi owesithathu waboshwa ngesikhathi kunokudubulana phakathi kwawo nalaba basolwa.

Ngokusho kwamaphoyisa athi alunywe indlebe ithimba lezobunhloli eliveze ukuthi bakuziphi izinkalo laba basolwa abebefunelwa ubugebengu obahlukene endaweni okukhona nobokugqekeza emzini yabantu.

Kuyo lenyanga sibike ngokubulawa komsolwa oyedwa kwalimala kabi ababili abathinteka esigamekweni sokubamba imoto yemali esigcemeni sakwa-L KwaMashu.

Laba basolwa abebehamba ngemoto yohlobo lweToyota Cross eyadunwa eMlaza nokuyiyona abayisebenzisa bebamba ngayo imoto yemali futhi bavinjezelwa amaphoyisa behamba ngayo ePhungashe, eningizimu yesifundazwe.

Balahlwe ngelakubo ngesikhathi betholana ngezulu lezandla namaphoyisa eXopo.

Kubikwa ukuthi amaphoyisa athole umkhondo ngezobunhloli mayelana nabasolwa abebehlela itulo lokubamba imoto yemali.