Baphelile isibhaxu osomatekisi amaphoyisa engenhla
Liyah Mseleku
Kuqhume impama nesimbambamba e-ranki yamatekisi e-Clermont esigcemeni sase-KK, entshonalanga yeTheku eduze negaraji lakwa-Shell.
Kuthiwa amaphoyisa abengagayelwe mphakho afike alalisa osomatekisi phansi ngobuso bacabuza umhlabathi.
Abebekhona bathi kubuzwe abasolwa abathile bakhonjwa bathathwa bafakwa ekhumbini.
Kuboshwe abasolwa ababalelwa ku-10 kuya ku-15 endaweni yesigameko.
UMnyango wezokuThutha nokuHlaliswa kwabantu oholwa uNgqongqoshe uSiboniso Duma usishayele ihlombe lesi senzo samaphoyisa.
“Ngizibophezele ukusebenzisana noLt General Mkhwanazi ukuqinisekisa ukuthi isigameko esenzeka enxanxatheleni yezitolo iMaponya ayenzeki kwaZulu-Natal” kusho uDuma.
Kwezeka lesi sigameko nje kusanda kokudutshulwa uMhlengi Mfeka oshayela imoto ekhokhelwa ngebanga elihambile ngoLwesithathu eClermont.
Inhlangano yabashayeli bama-Uber (e-hailing) KwaZulu-Natal (KZN E-Hailing Council) ithi ikhathazekile ngokungaphephi kwezimpilo zabashayeli babo.
Bekusho lokhu ngemuva kokuthinabashayeli ababili babo besinde behlaselwa ngoLwesithathu eClermont, eThekwini.
Ngokusho kukaMnuz Sipho Mabika, okhulumela le nhlangano ithi omunye wabashayeli babo ubelinde ikilayenti, ngesikhathi kuza othile kuyena esebenza ematekisini wamtshela ukuthi makahambe.
Uthi emuva kwalokho uzwe sekuqhuma isibhamu, imoto abehamba ngayo isidutshulwa.
Omunye umshayeli wabo kuthiwa uhlaseliwe, washaywa. I-KZN E-Hailing Council ithi ifuna uhulumeni ungenelele ngokushesha.
“Bobabili abashayeli bahlaselwe bezesimotweni zabo, bobabili baphuthunyiswe esibhedlela. Siwavulile amacala emaphoyiseni, sifuna baboshwe abantu abenze lokhu ngoba bayaziwa,” usho kanje.
NB: Marketing & Advertising WhatsApp/Call-073 062 1169
