Amacala abucayi abhekene noGogo Maweni ogqunyiwe
Phila Luthuli
SIMUMCU isimo kuMakhotso Mofokeng odume ngelikaGogo Maweni ogqunywe esitokisini kuze kube yisonto elizayo ngoMsombuluko.
Lesi sangoma besivele kancane enkantolo yeMantshi eProtea ngamacala abucayi.
Phakathi kwawo kubalwa elokushaya ngenhloso yokulimaza nawokubulala.
La macala kuthiwa enzeka ngo-2019 kanti ubemelwe ummeli uMarcia Makuse ocele ukuba ingazivumeli izintatheli nokho isicelo sachithwa inkantolo.
UGogo Maweni ungesinye sezangoma ezidume kakhulu ezinkundleni zokuxhumana.
Useke wavela nasezinhlelweni zikamabonakude okubalwa kuzona Izangoma Zodumo kuMzansi Magic.
Ezinsukwini ezinhlanu ezedlule iPurpose ibike ukuthi uGogo Skhotheni noGogo Maweni baqede impi yamazwi nokungcofana esidlangalaleni.
Phezu kwalokho bahlela nokwenza idili likamkhipheni bathelelane amanzi bakhe kabusha nobungani.
UGogo Maweni wacashunwa ethi kuphatha kabi okwenzeka phakathi kwabo.
“Sizizwa kabi ngakho konke okubi okwenzeka phakathi kwethu, siyazi ngokulumela kwezinto esazikhipha ngeyethu imilomo. Sikhulumile ngakho sathelelana amanzi,” usho kanje.
Lezi zangoma bezihlela ukuhlangana kwinightclub kaSkhotheni ukuzodla gqoko lunye.
“Gogo Skhotheni ngimumema ukuthi afike notokoloshe bakhe azothenga amabhodlela abizayo echampagne,” kuncokola uMaweni.
Uke waba sematheni ngesikhathi kuvela ukuthi ungunina wezingane zabantu abadumile okubalwa umlingisi uSithembiso Khoza nomdlali webhola likanobhutshuzwayo uSiyabonga Zulu.