Amabutho kaZulu ’empini’ yomhlaba noNgqongqoshe
Liyah Mseleku
AMABUTHO kaZulu ngoLwesihlanu azoba nombhikisho onokuthula ngaphandle kwamahhovisi eNgonyama Trust, eMgungundlovu, KwaZulu-Natal.
Lo mbhikisho uzobe uholwa nguMdidiyeli uMntwana uVanana waKwaMinyamanzi. Kwenzeka lokhu nje kunokuhhomozela phakathi kwebhodi neSilo esinguSihlalo walo.
Kuzokhumbuleka ukuthi iSilo sisanda kumisa amalunga ebhodi okuthole ukuphikiswa uNgqongqoshe wezokuThuthukiswa kweziNdawo zaseMakhaya nokuBuyekezwa koMhlaba uMzwanele Nyhontsho.
UNyhontsho ugcizelela ukuthi nguyena kuphela onamandla okuthathela izinyathelo ibhodi. Isilo samaZulu simtshele kwezikabhoqo uNgqongqoshe ukuthi kukhala esakhe isicathulo.
Sikusho lokhu encwadini esiyibhalele uNgongqoshe ngoLwesibili ntambama sivutha singabaselwe.
Simtshele nokuthi ngokwezigaba ezithile zeNgonyama Trust sinikwe igunya lokuba uSihlalo webhodi ngaphandle kokuthi size siqokwe noma siphakanyiswe njengoba kwenzeka kuwona wonke amalungu ebhodi.
“NjengeNkosi yesizwe samaZulu ebhekele umhlaba kaZulu, nginalo lonke ilungelo engilinikezwa izigaba zomthethosisekelo weNgonyama Trust ukuba ngithathe izinqumo egameni loMbuso. Ngakho kangiqondi ukuthi uNgqongqoshe ukuphikiselani lokhu,” kusho Isilo.
Sithe kuyamangaza ngoba mhla ka-2 kuDisemba sambhalela uNgqongqoshe ngezinyathelo okwakumele zithathelwe ibhodi leNgonyama Trust kodwa kuze kube manje akakaze aphendule.
Siveze nokuthi sesigudluzwe ngisho ekusayineleni izimali zeNgonyama Trust ebhange ekubeni singazi. Kulokhu sikhomba ngenjumbane amalungu athile ebhodi kanye nesikhulu u-Advocate Vincent Mngwengwe.
