I-Articulate Africa iqhakambise umsebenzi wamaciko

Sindiswa Nxumalo

Kuhlonishwe amaciko embukisweni wokwethulwa kwengqungquthela i-Articulate Africa esebenza namaciko eMkhumbane Museum ngoLwesibili.

Lo mcimbi ubuhanjelwe amaciko ahlukahlukene okubalwa kuwo abaculi, ababhali bezincwadi, izimbongi nabanye.

“Uma ukholelwa kuwe akukho ongeke ukwenze, ubuciko buyaphilisa,” kusho umbhali u-Ektor Somera.

“Kuyintokozo enkulu ukwabelana inkundla namaciko angozakwethu esinawo kulo mcimbi,” kubika uFikile Simelane.

USimelane ongumbhali wezincwadi ugqugquzele wonke amaciko ukuthi angapheli amandla ngoba ubuciko babo buletha ukuphila.

“Njengombhali, imicimbi efana nalena isinika amandla okuthi siqhubeke sibhale ngoba sizizwa sisekeliwe,” kuphawula umbhali uSwazi.

USwazi uchaze ukuthi ugqozi lokubhala waluthola ngesikhathi ecwile ezikweletini, inhloso ukuhlenga abanye abasezikweletini.

Izihambeli ebezihambele lombukiso aziwuvali umlomo ngobuhle balo mbukiso.

“Bengingazi ukuthi indawo la kuhlangene khona amaciko kugcwele injabulo engaka,” kuncoma uZandile, omunye wezihambeli.

Amaciko avumelane ngazwi linye ukuthi ukwesekwa akusho ukuphiwa imali, kepha ukuphiwa ithuba lokubonakalisa imisebenzi yawo.