Udonse intambo wazikhunga obehlulwa yimpilo
Bahle Mkhize
Usizwe yindodakazi eneminyaka engu-16 ubudala owesilisa oqome ukuzikhunga ngentambo ngenxa yokuhlulwa yezinkinga zasemhlabeni.
Le ndoda yaseThekwini eneminyaka engu-49 ubudala kuthiwa iqale yathumela umyaleko kwiselula yomkayo obengekho ekhaya imazisa ukuthi isekhathele ukuphila kulo mhlaba.
Unkosikazi kuthiwa uwushaye indiva lo myalezo njengoba lo wesilisa kuthiwa yinto abesejwayele ukuyenza uma ezwa impilo iba nzima.
Kulokhu akagcinanga ngokuyaleza njengoba kuthiwa udonse intambo uzikhungile ezibophele ophahleni.
Kuthiwa indodakazi abesele nayo lo wesilisa ibone lesi sehlo yaphithuma ekhishini yadonsa ummese wezinkwa yasika intambo.
Abosizo lokuqala bafike endaweni yesigameko elele phansi nokho esawuphonsa umbalane.
Ube esethuthunyiswa esibhedlela isimo sakhe sibucayi.
Khonamanjalo, zimkhalele owokudabuka eNigeria (59) okuleli ngokungemthetho obhadanywe nenqwaba yezidakamizwa zenani lika R40 000 eBlue Lagoon, eThekwini.
Uboshwe yiMetro Police Tactical Support Unit ebilokhu izulazula iqaphe isimo. Ubhadanywa nje lo mlisa wuye okuthiwa abelokhu ebakaza esolisa. Lezi zidakamizwa kuthiwa zilinganiselwa ku-100 gm.
Amaphoyisa kaMasipala weTheku akachithanga sikhathi amdlulisela kwiDurban Central SAPS ukuze kuqhutshelwe nophenyo kodwa evalelwe lo msolwa. Amaphoyisa azishaya isifuba ngokubopha lo msolwa.
