Kugqame amalebuli enegama kubasolwa kwelokubulawa kwa-AKA

Philasande Luthuli 

Bavele begqoke izimpahla ezinamagama abizayo abasolwa eNkantolo yeMantshi eThekwini uSiyabonga noMalusi Ndimande.

Amagama agqamile amalebuli abebewadlubhile kubalwa iGuess ne-Adidas.

Lezi zelamani zisolwa ecaleni lokubulala uKiernan “AKA” Forbes nomngani wakhe uTebello “Tibz” Motsoane eFlorida, eThekwini, ngo-2023.

USiyabonga Ndimande ogqoke isikibha esimnyama kuthiwa inkunzi yenkabi engenanembeza ebiqashwa ngezimali ezishisiwe ukubulala abantu.

Kuleli cala kuthiwa bakhokhelwa isamba sika-R800 000.

Lokho kufakazelwa ukugqoka amalebuli abizayo.

Isigameko sakamuva nje ngaphambi kokuthi aboshwe kuthiwa wabulala amalungu amabili omndeni wakwaNgcobo.

Enkantolo kuphinde kwavela amacala amaningi ahlukene okubalwa awokubulala, awokuzama ukubulala, ukutholakala nezibhamu nezinhlamvu ezingekho emthethweni.

Phakathi kwamanye amacala avelile kukhona elokubulawa kwaWilliam Kenene (57) ngo-2022.

UKunene wabulawa ethenga esitolo esikhulu saseThekwini odlameni oluhlobene namatekisi.

Lezi zelamani zazibalekele eSwatini zaphinde zaboshwa khona zase zizama ukuvimba ukubuyiswa kwazo eSouth Africa.

Nokho inkantolo yase Swatini yasichitha isicelo sabo njengoba bebuyiselwa kuleli.

Sebebonke bayishikhombisa ababoshelwe icala lika AKA.

Laba basolwa bazohlangana bonke nalaba ababoshwa kuleli.

Lezi zelamani bezimelwe ummeli uSibusiso Dlamini no-Advocate Cyril Mlotshwa kanti umbuso umelwe umshushsisi uLawrence Gcaba.

Icala lihlehlele umhla ka-25 November 2025.