UNgqongqoshe ukhalisane nomndeni womshayeli we-Uber ongqongqisiwe
Luthinte noNgqongqoshe wezokuThuthukiswa koMphakathi KwaZulu-Natal uNkkz Mbali Shinga udaba lukaMvelase, obengumshayeli we-Uber (e-hailing) eGoli.
UMnuz Siyanda Mvelase (27) ubulawe ngesihluku ngaphandle kwenxanxathela yezitolo iMaponya, eSoweto, ngoLwesithathu ebusuku.
NgoMsombuluko uNgqongqoshe uhambele umndeni kaMvelase eNhlungwane, oLundi, ukuyokhalisana nomndeni.
Kusolwa umbango wemizila phakathi kwabamatekisi nabama-Uber njengembangela yokufa kwakhe.
Ziqinile izinsolo zokuthi uqale wadutshulwa maqede washiswa nemoto esigamekweni okusabalale ama-video waso ezinkundleni zokuxhumana.
Ungqongqoshe, ehambisana nezinye iziphathimandla zoMnyango udlulise amazwi enduduzo.
Uthe uhulumeni wesifundazwe uzokwelula isandla ukusiza umndeni ngezinto ezehlukene okubalwa kuzo nokulandwa kwezinsalela zakhe.
“Okokuqala nje, uMnyango uthathe isinqumo sokuba kujutshwe ithimba losonhlalakahle abazosiza umndeni ngokuweluleka njengoba ubhekene nesimo esinzima”
“Sikuqaphele ukuthi akukho muntu osebenzayo kulo mndeni. Sizwile nokuthi uSiyanda uphume ekhaya enephupho elihle ngekubo”
“Konke lokho sizokubheka emuva komsebenzi esibhekene nawo kumanje. Umndeni sizokwenza isiqiniseko sokuthi uthola ukwesekwa okusezingeni kulesi sikhathi esinzima,” kusho uShinga.
NB: Marketing & Advertising WhatsApp/Call-073 062 1169
