Abuyela emjolweni Amabhinca nge-EP entsha
Jerome Thabethe
Igcagcele esokeni eqenjini lomculo Amabhinca elikhiphe i-EP esihloko sithi Sizophumelela.
Leli qembu elishisa bhe libunjwe uSmonyo noMhlengi Mdlalose kanti uSmonyo igama lakhe langempela uKwazi Dlamini.
Womabili la majongo asuka esigodini esisodwa kwaNomdiya, eNkonjeni, Olundi.
IPurpose ixoxisane noSmonyo mayelana nesasasa lomculo kaMaskandi nokuthi wangena kanjani emculweni.
“Ngiqale ukuqopha ngo-2021 ingoma yokuqala esihloko sithi Albinism. Ngibuye ngalendelisa nge-EP esihloko sithi “Uyangeshela, ngenza icwecwe esihloko sithi Ndibuyela emjolweni.
“Iyona eyadonsa abathandi bomculo ngoba namanje isashisa idlalwa yonke indawo”
“Asigcinanga lapho ngo-2022 sakhipha i-album esihloko sithi Umthandazo kamama, nayo yenza kahle”.
Kwathi ngo-2023 ngakhipha i-EP esihloko sithi Sarafina.
Ngibuya manje ngengoma ekwi-EP esihloko sithi Sizophumelela.
Elandisa uSmonyo uthe baqopha eSilver River Studio, ezinze eMlaza nesiphethwe uNkunzebomvu Mchunu.
Ziningi izindawo esebeke babizwa kuzo ukuyonandisa okubalwa Olundi badlale kukhonsathi kaSomnandi Maskandi Festival.
Badlalile nakwa Nongoma, eGoli nakwezinye izindawo.
EThekwini bakwazile ukuba ingxenye emcimbini osuzakhele idumela obizwa ngeMpucuzeko Maskandi Festival.
IPurpose ithole uSmonyo eziphumulele noJeqe ongumshayi wesigingci ozalwa eFakazi kodwa njengamanje bazinze eMgababa.
USmonyo ukhuthaza bonke abafisa ukungena kulo mkhakha womculo ukuthi kumele ube nokuqonda ngento ongena kuyo.
Uthi izingoma zabo zibavulele amathuba ngoba bangene emculweni bengenalutho.
