Zingene nezicabha ezikadalawane ejele eWestville zavuka namabiba
Sihle Mkhize
Zingene nezicabha ezikadalawane kwancane indawo ejele laseWestville, eThekwini, ngoLwesine ebusuku.
Zigasele ngesikhathi iziboshwa zisahuqa obudala ubuthongo imibhede yabheka phezulu.
Bekufuneka lokho okungavumelekile kwiziboshwa ngenhloso yokuqinisa ezokuphepha, nokubuyisa uzinzo.
Abakwasidlodlo bazithele kwinqwaba yamaselula, insangu, izidakamizwa okubalwa imandrax, Ecstasy, izigubhu ezilayishe utshwala bokuzigayela, izikhali ezicijile nokunye okuningi.
UKhomishane kazwelonke kwiCorrectional Services uMakgothi Thobakgale uthe bazovuna abakutshalile labo abagade amajele okuhlanganisa izimenenja ngalezi zinto ezitholakele.
Lo mshikashika awuqalanga izolo sikhuluma nje kubhadanywe uVusumuzi “Cat” Matlala neselula esitokisini.
UCat usematheni kulezi zinsuku ngenxa yokuvela kobudlelwano bakhe noNgqongqoshe Senzo Mchunu.
NgoLwesibili ebusuku nangoLwesithathu ntathakusa uThobakgale nethimba lakhe bagasele kungazelele bani ezitokosini zase Kgosi Mampuru Correctional Centre ePitoli.
Baze bangena shi, nakwiziboshwa ezithathwa njengeziyingozi eC-Max Section nalapho bebhadame khona uCat.
Lolu phenyo langoLwesibili noLwesithathu landulela ukugasela kwabomthetho ngeSonto kuleli jele.
“UCat Matlala useC-Max lapho kugqunywa khona iziboshwa ezinobungozi kakhulu, sisazoqhubeka nokwenza uphenyo olunjengalolu lwayizolo,” kusho uThobakgale.
“NgeSonto ekuseni senza uphenyo olungalindelekile sathola iselula kuyena”.
“Ngaleso sikhathi uMatlala wayese “Local” section lapho kugqunywa khona abangenabo ubungozi obukhulu.
“Wayese medium local,” kusho uThobakgale.
AboMnyango wezamaJele bathe uphenyo lusendleleni ukuze kutholakale ukuthi kwenzeke kanjani uMatlala abe neselula ekubeni usejele.
NB: Marketing & Advertising WhatsApp/Call-073 062 1169
