Zimkhalele obehlanganisa ekaKhisimusi ebhishi
Liyah Mseleku
Zimkhalele owokudabuka eNigeria (59) okuleli ngokungemthetho obhadanywe nenqwaba yezidakamizwa zenani lika R40 000 eBlue Lagoon, eThekwini.
Uboshwe yiMetro Police Tactical Support Unit ebilokhu izulazula iqaphe isimo.
Ubhadanywa nje lo mlisa wuye okuthiwa abelokhu ebakaza esolisa. Lezi zidakamizwa kuthiwa zilinganiselwa ku-100 gm.
Amaphoyisa kaMasipala weTheku akachithanga sikhathi amdlulisela kwiDurban Central SAPS ukuze kuqhutshelwe nophenyo kodwa evalelwe lo msolwa.
Amaphoyisa azishaya isifuba ngokubopha lo msolwa.
Khonamanjalo ngoMsombuluko kudutshulwe kwabulawa umsolwa obefunelwa uxhaxha lwacala ngesikhathi edubulana namaphoyisa Maydon Wharf, eThekwini.
Phakathi kwamacala abefunelwa wona umsolwa kubalwa elokuzama ukubulala kwaSawoti kuyo le nyanga kaDecember.
Ubebuye amataniswe ngokubulawa kwabantu abane eMbumbulu.
Naphezulu kwalokho ubefunelwa icala lokubamba imoto ethwala imali eMlaza ngomhla ka-5 December.
Kube sekutholakala imikhono yekati emibili endaweni yesigameko. Esisidwa isibhamu sitholakale kuye uqobo umsolwa esinye satholakala etekisini abehamba ngayo.
Ubulawa nje lo msolwa amaphoyisa athola umbiko wokuthi lo umufi uhlome uzingovolo ubheke eThekwini.
Nebala amaphoyisa kaMasipala weTheku ayibonile le tekisi idla amagalani. Kuthiwa ngesikhathi bezama ukuyivimba umufi udedele imvula yezinhlamvu ebhekiae kumaphoyisa nawo angazibeka phansi amdubula washona.
Amaphoyisa avule icala lokuzama ukubulala eMaydon Wharf Police Station.
