Uvalo kudutshulwa usomatekisi eMona

Aphe Gcwabe

ULIMALE kanzima usomatekisi odutshulwe ngemvula yezinhlamvu eMona, KwaZulu-Natal, ngoMsombuluko ebusuku.

Inkampani yabaqaphi iReaction Unit South Africa (RUSA) ithi ithole ucingo kuthiwa abaphuthume bezolekelela.

Nebala labo nogada baphikelele khona seligamenxe ihora lesikhombisa.

Bazithele phezu kweToyota Fortuner ebigingqikile ilele ngohlangothi emgaqweni owubhuqu.

Kubikwa ukuthi kuqhamuke izimoto ezimbili zabe seziyihlala izithonto iFortuner, emuva kwalokho bayiqhulula ngezinhlamvu bebhekise kumshayeli. Umshayeli uhlulekile ukuyilawula yaphaphalaza kwaba ukugingqika kwayo.

Owesilisa otholakele phakathi kuvele ukuthi ungosomatekisi odumile.

Ube esephuthunyiswa esibhedlela ngenye imoto ngaphambi kokufika kwabeRUSA endaweni yesigameko.

Imbangela yokudutshulwa kwakhe ayikaziwa.

Khonamanjalo sisalokhu siqhubeke njalo nokuqhuma isibhamu embonini yamatekisi Emnambithi.

Imibiko yakamuva ithi sekuphinde kwadutshulwa kwabulawa omunye usomatekisi odumilei, ngaphansi kwenhlangano iKlipriver Taxi Association.

Udutshulwe washonela khona endaweni yesigameko emini ngoLwesibili eduze kwase Indoor Sports Complex.

Imbangela yokubulawa kwalo somatekisi ayikaziwa kodwa kusolwa impi yawo amatekisi.

Kwenzeka lesi sigameko nje akukapheli isikhathi esingakanani kubulewe ngesihluku umndeni wakwa Thwala nowakwa Thusi nayo abebesembonini yamatekisi.