Usadonsa ngodizili umlingisi oswele ngisho ishumi
Bahle Mkhize
UMLINGISI owazakhela igama elingisa kahle indawo kaDuke kwiBackstage eminyakeni edlule uCarlo Radebe ucela usizo lwemali.
Ngo-Ephreli uRadebe waba sematheni kuvela izindaba zokuthi uswele ngisho indlu yokufihla ikhanda kulandela ukuvalwa thaqa kwendima kaqedisizungu ngesikhathi seCovid-19.
Kwaba khona oMsamariya abanesihawu abamxhasa izinsukwana ngemali ukuze axoshe ikati eziko. Kwavela nezindaba zokuthi uDuma kaNdlovu ongumsunguli wemidlalo yethelevishini uzomnika itoho lokuqeqesha abalingisi.
URadebe uthi usebe ngumahlalela iminyaka.
Ubhale kuFacebook ukuthi usaphila kodwa udonsa kanzima.
“Ngithi anginazise balandeli bami ukuthi ngisalinde umnyama ongenafu. Ngilinde ukuthi kukhanye ngaphambi kokuthi uphele lo nyaka. Sekuphele cishe iminyaka emithahu ngingasebenzi kodwa okungapheli kuyahlola,” usho kanje.
URadebe ube esecela abalandeli bakhe ukuthi bamnikelele ngemali emuva kokubanjiswa isisila sehobhe.
Uqhube ngokuthi izimali anikelelwa zona zama emuva kokuthenjiswa umsebenzi ongakaze uqinisekiswe naye noma ne-agent yakhe. Kanjalo nendawo yokufihla ikhanda akaze ayithole. Leli gidigidi elaba khona kuthiwa uzosizakala laphelela emoyeni. Uthi wasala engenalo ngisho isenti kusukela ngoJune esalinde umsebenzi okwakumele awenze ngaphambi kokhetho.
“Ngicela niphinde ningisize ngomnikelo ukuze ngiphile. Enangiphonsela khona ebhange ngo-Ephreli kwaphela evuma kwezinsuku ezine.
URadebe uphinde aziwe ngokulingisa kahle kwiNumber Number, Amandla neHow to Steal Two Million.
Lolu qweqwe lomlingisi lwafunda izifundo zeDrama eTechnikon Pretoria ngaleya minyaka.
