Umsindo ngezindondo zika Zanele Mbokazi esemakhazeni
IMBONGI ehlonishwayo kuleli uMzwakhe Mbuli udalule ukuthi umqondo weSABC Crown Gospel Awards kwaba ngowakhe.
Ukusho lokhu ngesikhathi abalandeli bakhe okuhlanganisa uKhozi FM bezilele uZanele Mbokazi-Nkambule (52) okwaziwa ukuthi nguye umnikazi.
Kuvela lokhu nje, uMbuli ubebhodla emswaneni ngesitatimende lapho ethi washenxa ngoba wayeneminye imisebenzi eminingi.
“ICrown Gospel Awards kwaba umqondo wami, icebo lami. Noma kunjalo ngancamela ukuthi ngiwashiye naye ngoba wayenehlo lokuvundulula abaculi beGospel ababencishekile amathuba,” phakathi kokunye akushilo.
Utshele iSunday World ukuthi konke kwaqala ngesikhathi kusaphila uMvuzo Mvebe futhi u-Adv Dali Mpofu wayesasebenzela iSABC ngaleso sikhathi.
“UDali Mpofu wayeyi SABC Group CEO ngaleso sikhathi, naye angafakaza. Angikaze ngimlwise uZanele ngoba ngangijabulile ngendlela ayephendula amatafula ngayo. Engangikufuna nje, wukuthi ngibone abaculi beGospel behlonishwa ngoba lo mculo wawumkhulu kakhulu, kuqhuba uMbuli.
Usho kanje uMbuli ngenyanga ezayo kuthiwa umcimbi wamaCrown Gospel Awards uzoba khona njengoba bekuhleliwe esaphila.
UZanele shone ngoMsombuluko ekuseni esibhedlela esiseThekwini exinwe isifo somdlavuza.
Khonamanjalo ngoLwesithathu emini uLinda Bukhosini ongumphathi weThe Playhouse, uSbongi Ngcobo ongumphathi woKhozi FM noDkt Zweli Mkhize babe ngabanye abaye kobhonga emswaneni ngokudlula kwalo msakazi emzini wakhe.
