Ujika nelanga uthishomkhulu onenebula abafundi
UJIKA nelanga uthishomkhulu waseMadisong Secondary School eTemba, Tshwane, kulandela ukumiswa ngezinsolo zokugqubuza abafundi.
Ithumba liqhunjuswe umfundi ovekhihla esikaNandi ngalo thisha owamnenebula ngoFebruary emuva kokuphutha kwezinye izifundo zangamaholidi.
Kube aekuvela omunye umfundi okhale esifanayo ethi isandla sasiqaqamba umhlola emuva kokunenebulwa naye ngecala elifanayo.
Abafundi bathi ukuqhuma kwesibhaxu yinto yansuku zonke kulesi sikole.
Ngokombiko weScrolla.Africa uMnyango wezeMfundo eGoli ngomlomo kaSteve Mabona ukuqinisekisile ukuthi kunophenyo olwenziwayo ngaphakathi.
“Siluleke ukuthi abazali bavule amacala ukuze amaphoyisa enze uphenyo. UThisanhloko uzobe ebika ehhovisi leDistrict kuze kuphume isinqumo ngaye,” usho kanje.
UNgqongqoshe wezeMfundo uMatome Chiloane uthe udinwe ugane unwabu ngalezi zinsolo wathembisa izinyathelo ezinqala uma kuvela ukuthi izinsolo zibe yiqiniso.
“Sikhumbuza othisha ukuthi kushaywa kwezingane esikoleni akwamukelekile ngokomthetho. Udlame aludingeki abatholakale benza lokhu bazojeziswa,” usho kanje.
Khonamanjalo, iPurpose ibike kabanzi ngumfundi (11) waseBhekaphambili Primary School, eLamontville, ngemuva kokuthi eshaywe uthisha waphuka ingalo.
Lesi sigameko senzeke ngasekupheleni kwa-Agasti ngonyaka odlule kodwa besifihliwe njengoba kuthiwa uthishanhloko wazama ukuvikela uthisha ukuthi angabhekani nobulungiswa.
Udaba lwaze lwavela ngoSeptember.
Kuthiwa uthishanhloko uqale wathi uMnyango wezeMfundo uyaluphenya lolu daba nokwagcina kuvela ukuthi uqamba amanga.
Ngokusho komndeni kaSimphiwe, ingane ishaywe wuthisha esikoleni.
“Sabizelwa esikoleni uthishomkhulu wasitshela ukuthi iDepartment of Education iliphenyile icala kwatholakala ukuthi isikole asigcobho nokwaholela ekutheni sivule icala ngokwethu,” kusho uLindiwe Nxumalo ugogo womgilwa.
