UDr Ndlozi uthole umsebenzi omusha emsakazweni
Sihle Mkhize
UDOKOTELA Mbuyiseni Ndlozi osanda kusula ekubeni ilunga leqembu i-Economic Freedom Fighters (EFF) usengumsakazi omusha wePower FM.
UNdlozi uzoshayela uhlelo iPower Talk kusukela ngoMashi, lezi zindaba uzidalule eGoli ngoLwesihlanu. Nesiteshi siziqinisekisile lezi zindaba bathumela nesitatimende kwabezindaba.
“IPower 98.7 iyazigqaja ngokumemezela ukwengeza uDr Mbuyiseni Ndlozi ethimbeni labasakazi. Uyaziwa ngamagalelo wakhe nangephimbo lakhe. UDr Ndlozi uzothula iPOWER Talk kusukela ngenyanga ezayo.
“Ngekhono lakhe elimangazayo nangendlela acabanga ngayo izoba nomthelela kubalaleli bethu ekuletheni inkulumo mpikiswano enokucusa uhlevane. Ukuba khona kwakhe kuthembisa izingxoxo ezizobe zakha ikakhulukazi lezo ezizobumba izwe nomhlaba jikelele,” kubhalwe kanje.
UNdlozi ebeka ngendima okumele ayilime uthe: “Umsakazo unamandla ayisimanga okudingida ezihlabahlosile. Ngijabulile ngaleli thuba engilinikwe kwiPower 98.7 ukuvivinya abalalaleli bathuthukiawe kuphindwe banikwe nethuba lokumunyunga imibono yabo mayelana ngesimo sezwe lethu nomhlaba jikelele.
Ngesonto eledlule udalule ukuthi ushiya phansi kwezepolitiki ukuze abhekane ngqo nemfundo nokuthuthukisa umphakathi.
