Okwenze iChiefs iwashe ijezi zisuka koweNedbank
IKaizer Chiefs ebingompetha abavikela indebe iNedbank Cup bawashiswe ijezi yiStellenbosch FC emzuliswaneni wokuqala.
Amakhosi aguqe ngo 2-1 kulo mdlalo kanti amagoli eStellies ashaywe ngo-Ibraheem Jabaar ngephenathi noDevin Titus odonse intambo ekude.
Elokubika ekhaya eNaturena leChiefs lishaywe uFlavio Da Silva kanti nalo bekuyiphenathi akayinamathisele enethini esiwombeni sesibili.
Umqeqeshi weChiefs uCedric Kaze usale ekhala, waveza asola ukuthi yikho okubaqhathe nenduku bebhuliswa amazolo.
Ekhuluma ngemuva komdlalo, uKaze ukhale ngokudembesela kwabadlali bakhe ikakhulukazi ngasekuqaleni komdlalo.
“Ngikholwa wukuthi asizange singene emdlalweni zisuka, asizange sibe nomqondo ofanele,” kusho uKaze.
“Sidedele namagoli ebesingawavika emizuzwini yokuqala engu-20 ngenxa yobudedengu.”
Yize engamgagulanga ngegama, ukhale nangamathuba alula ayekwe uMduduzi Shabalala ophume oqekelele kwaze kwaba amahlandla amathathu.
Nokho lo mdlali uhlulekile ukuwasebenzisa lawo mathuba – uvinjelwe uSage Stephens kabili, elesithathu walishaya laphuma eceleni.
“Ngikholwa nawukuthi siwatholile amathuba amahle aze aba mathathu la besibhekene ngqo nonozinto kodwa asangayishaya inethi.
“Cishe namuhla bekuwulolo suku la yonke into esiyizamile ingaphumelelanga,” kuqhuba uKaze.
“Nasesiwombe sesibili sakhe inqwaba yamathuba, sashaya nepali kabili noma kathathu.
“Manje kumele sizame ukuqina bese sibheka phambili emdlalweni wangeSonto okungumdlalo omkhulu kwawona.”
IChiefs izokwamukela i-Al Masry ePolokwane emdlalweni weCaf Confederation Cup ngeSonto ntambama.
Lisenethini
NB: Advertising WhatsApp/Call 073 062 1169
