Okusha ngomlingisi uCarlo Radebe obephila ngokukhangeza
Liyah Singela
OBEKUDLIWE isikhonyane kuzobuya sekuphindwe kwashumi kumlingisi uCarlo Radebe nobesephila ngokukhangeza.
Lokhu kuza emuva kokuthi ubesephila ngo-R350. Lezi zindaba zihambe zaze zafika kwiDuma Ndlovu Actors Academy eholwa uNdlovu osekhiqize iMuvhango, Generations, iMbewu neminye imidlalo.
I-Academy ibe isihlaba umkhosi icela ukufuniswa uRadebe. Akuphelanga zinsuku njengoba isanda kwazisa abantu ukuthi sebemtholile. “Umuntu ungumuntu ngabantu, siyabonga kakhulu usetholakele uCarlo,” babhale kanje kuFacebook.
Umngani kaCarlos uMauritz Neethling uye ohlabe umkhosi wabika ezinkundleni zokuxhumana ukuthi lomlimgisi ubhekene nezinkinga zezimali. Lo makadebona wazakhela igama kwiBackstage elingisa indawo kaDuke. Waphinde wazakhela ugazi edlala kahle indawo kaSello Mvuyane ku-Generations.
“Ngicela kunina nonke eninezinhliziyo ezinhle ukuthi nisize umngani, noma ubani ongakwazi ukusiza. Njengamanje udwanguza ebumnyameni futhi uselahlekelwe ithemba. UCarlo Radebe waziwa njengomlingisi, udinga usizo ngendlela eyisimanga,” kusho uMauritz.
UMauritz uphinde wacelela lensizwa indawo yokufihla ikhanda, airtime, nomnikelo ongakwazi ukumvusa njengoba eshayekile.
Kuzokhumbuleka ukuthi izimboni nemikhakha yezokulingisa zavalwa thaqa ngesikhathi kuhlasele ubhubhane iCovid19. Kuthiwa kulapho ke, zaqala khona izinto ukubheda empilweni yakhe.
UQuinton Mlaza ubhale kuFacebook ukuthi ufisa sengathi angasheshe atholakale ukuze aqale ukusebenza njengoba ekhumbuleka kuthelevishini.
