Iso ngeso Amajita edla iMorocco kowamanqamu
Zibuye emuva kweminyaka engu-28 izinduku iNingizimu Africa iguqisa iMorocco emdlaweni wamanqamu.
Lamazwe womabili ayizimbangi ezindala ebholeli lakuleli. Kuzokhumbuleka ukuthi iMorocco yadla iBafana kowamanqamu.
Kulowo mdlalo uBennie McCarthy akadlalanga ngenxa yokuthola ikhadi elibomvu emdlaweni owandulela owamanqamu.
Kulokhu kushintshile ukudla epletini Amajita anqoba ngo 1-0 isicoco seCaf, Under 20 Africa Cup of Nations, edla lezi zimbangi ngeSonto ebusuku.
Igoli eliweze leli qembu elicijwa uRaymond Mdaka lishaywe nguGomolemo Kekana.
Ibhola ubeliphakelwe ngunozinti uFletcher Smythe-Lowe, okhiphe iphasi kanokusho isuka emuva.
Lokhu kube ukunqoba isicoco sokuqala ngqa kweNingizimu Afrika kulesi sigaba sebhola.
UPitso Mosimane ozakhele igama eqeqesha iMamelodi Sundowns ne-Al Ahly ujoyine abathandi bebhola ekugubheni lesi sikhathi esiyingqophamlando.
“Iqembu laseNingizimu Afrika lika-Under 20 linqobe i-Afrika,” ubhale kanje lo mqeqeshi ezinkundleni zokuxhumana.
“Singompetha base-Afrika. Saze sasihle lesi sikhathi empilweni yethu lapho iNingizimu Afrika ithola yonke le mpumelelo,”
Khonamanjalo, Amajita aphinde ahlomula nangezindodo zomdlali ngamunye sekuklonyeliswa abenze kahle kulo mqhudelwano.
UFletcher Lowe-Smythe uqokwe njengonozinti walo mqhudelwano ngemuva kokungangenelwa goli emidlalweni emine kweyisikhombisa ayidlalile.
Kule midlalo emine angangenelwanga goli kuyo kukhona eyesigaba somkhumulajezi emithathu okuyi-quarter-final, owandulela owamanqamu nowamanqamu.
UTylon Smith, oshaye igoli lokunqoba emdlalweni owandulela owamanqamu uqokwe waba ngumdlali ovelele walo mqhudelwano obuse-Egypt.
I-Morocco yona ihambe nomklomelo we-Fair Play, onikwa iqembu elikhombise ukuziphatha kahle nomoya ofanele webhola.
UMomoh Kamara waseSierra Leone yena ubambe nowomshayimagoli ohamba phambili kulo mqhudelwano ngamamagoli akhe amane.
Lisenethini.co.za
NB: Marketing & Advertising WhatsApp/Call-073 062 1169
