ISilo sidube umcimbi kwehliswa imali
ISILO samaZulu uMisuzulu kaZwelithini sesidube uhambo lwaseMalawi obesekukhulunywe ngalo kaningi.
Lokhu kuza emuva kokuthi iHhovisi likaNdunankulu lehlise isibalo samabutho ebesifuna ukuhamba naso.
Isilo besiphakamise ukuthi sifuna ukuphelezelwa amabutho awu-300 kulo mcimbi. Umthetho Cultural Festival umcimbi ohlelelwa ukuqala ngoLwesithathu usongwe ngoMgqibelo eHora Heritage Centre eMzimba.
Ephendula abezindaba ngemuva kokwethula inkulumo yesifundazwe ngoLwesithathu uNdunankulu uThami Ntuli uthe ngokubambisana noMnyango wezokuBusa ngokuBambisana neziNdaba zoMdabu bazoluxhasa uhambo lwaseMalawi.
Kodwa uMntwana uSimphiwe Zulu utshele abezindaba okunye njengoba eveze ukuthi iNkosi ayisalubhadi lapho.
Uthe okudale lokho ukweselwa uxhaso olwanele, ingakho sekuzojutshwa amazinyane eSilo ukuyomela uZulu emcimbini.
“Ngingakuqinisekisa ukuthi iSilo angeke iye eMalawi ngoba sibone ukuthi kuzoba ukusihlambalaza nehlazo ukuhamba neqeqebana lamabutho,” kusho uMntwana uSimphiwe.
Ngesonto eledlule kuvele ukuthi lolu hambo beluzodla uhulumeni wesifundazwe imali engu-R3.6 million kodwa iNkosi yacelwa ukuthi yehlise isibalo sabantu ebihlela ukuhamba nabo.
Kwabuye kwaphakanyiswa ukuthi elinye ithimba lihambe ngamabhasi.
Lo mcimbi ungowokugubha iminyaka eyishumi inkosi M’mbelwa V wobukhosi baseNgoni ihlezi esihlalweni.
Ukufika kwethimba elincane elivela kwaZulu kuyizindaba ezijatshulelwe kakhulu eMalawi njengoba kuthiwe beselenyuse ibhajethi yafika kuK75 (kwachas) okuyimali enguR787 000 uma ishintshelwa kumarandi. INkosi M’mbelwa neSilo bayezwana njengoba yayikhona uMisuzulu engeniswa esibayeni ngo 2022.
