Isililo kudlula emhlabeni uDingaan Thobela
Aphe Gcwabe
Akasekho emhlabeni lowo owazakhela igama ngokushaya isibhakela esinenkosi phakathi uDingaan “The Rose of Soweto” Thobela.
Lo makadebona esibhakeleni kubikwa ukuthi udlule emhlabeni ngoMsombuluko eseflethini lakhe eMayfair, eGoli emuva kokugula isikhashana.
Izindaba zokushona kwakhe ziqinisekiswe yimenenja yeBoxing South Africa (BSA) eGauteng, uHloks Ramagole.
Umlandeli kaThonela uThando ubhale enkundleni yezokuxhumana iX ukuthi ukhumbula eminyakeni edlule umkhulu wakhe ekhalela lomshayi sibhakela. “Ngikhumbula ngo-1993 umkhulu wami ekhala “mi” uDingaan Thobela ecele udede uTony Lopez empini yeWBA lightweight wahlulwa kuleyo mpi. Kuthe ngasekupheleni kwawo wamcela impinda kodwa Lo mshayisibhakela waphendula amatafula wakwazi ukunqoba. Ulale ngokuthula,” ubhale kanje.
Wangena esibhakeleni esikhokhelayo ngo-1990 kwaze kwaba unyaka ka-2006, walwa izimpi ezigu-56 kuzona wanqoba ezingu-40, wehlulwa kwezingu-14 wadlala ngokulinga kwezimbili. Wazakhela umlando ephatha amabhande ahlonishwayo emhlabeni ele-WBO Lightweight, WBA Lightweights neleWBC Super-Middleweight. Udlule emhlabeni eneminyaka yobudala engu-57.
Intatheli yezemidlalo ehlonishwayo uVelile Mnyandu uphefumile ezinkundleni zokuxhumana uX.
“Zaze zazimbi izindaba esizithola kuwuMsombuluko ebusuku. Akasekho ngempela uRose of Soweto,” ubhale kanje.
Kulindeleke ukuthi umndeni uphefumule nezinhlaka zikahulumeni. Kwazise lesi sigameko senzeke ebusuku. Akungabazeki ukuthi uThobela uzokuthola ukuhlonipheka okumfanele noma eselele kobandayo nje.
