Amadoda amadala akhulelise abafundi baseprimary
ODADE ababili abasebancane base-Moshawane Village, e-North West, baphucwe ithuba lokufunda baphazamiseka ngemuva kokuba amadoda amadala ebakhulelisile.
Usisi omdala wayeka ka-Grade 7 eneminyaka engu-14 eyobeletha ingane yakhe yokuqala. Wathola ingane yesibili ngemva konyaka futhi njengoba eseneminyaka engu-16 manje. Udadewabo omncane, oneminyaka engu-14, naye usezithwele wenza njengoba efunda u-Grade 7.
Osebenza kusiShayamthetho sase-North West uTebogo Modise uthole lesi simo ngesikhathi eqhuba uhlelo lokuqapha ukuvulwa kwezikole e-Mojamorago Primary School ngoLwesithathu.
“Ngemuva kokuthi uthishanhloko ebone isisu sokuqala sokukhulelwa kusisi omdala, wahlangana nogogo wentombazane obagadayo selokhu kwashona unina,” kusho uModise.
Uthishanhloko wathola ukuthi umndeni uyayazi indoda ekhulelise intombazane endala.
Esikhundleni sokuthi abikele amaphoyisa, wamukela inkokhelo kowesilisa. Baphinda benza okufanayo ngesikhathi intombazane isikhulelwe okwesibili.
Izalukazi eziningi ezigodini aziqondi ukuthi kuyicala ukuthi umuntu omdala alale nengane, noma bemazi lowo muntu,” kusho uModise.
Uxwayise ngokuthi abanye besilisa basizakala ngemindeni entulayo ngokuyikhokhela ukuze bathule ngalo bugebengu.
UModise usewabikile womabili amacala emaphoyiseni ase-Mahikeng nakosonhlalakahle.
“Ikusasa lalezi zingane ezimbili lisengcupheni, enye isivele isiyekile isikole ifunda u-Grade 7 kanti inezingane ezimbili okumele izinakekele. Udadewabo angase ashiye phansi naye uma singazisizi,” esho.
Unxuse abazali nabanakekeli ukuthi bangabavikeli abahlukumezi, kungakhathaliseki ukuthi bangamalungu omndeni noma bakhipha imali yokubavala imlomo.
Scrolla.Africa
