Abanjwe oqotsheni kuN3 ‘amaphoyisa’ abamba inkunzi
Philasande Luthuli
BALAHLWE elakubo abasolwa ababili ababanjwe oqotsheni benze izimvimbamvila kuN3 phakathi kweVilliers neDe Hoek beqola abashayeli bezimoto.
Laba solwa bebedlubhe yonke imifaniswano yamaphoyisa basebenzisa ngisho nenomto ebhaliwe ungaze uthembe kanti ubanjwa inkunzi.
Kulokhu bacushelwe umgoga ngoLwesibili kuhlangene ezobunhloli emaphoyiseni babanjwa oqotsheni.
Babanjwe beduna imoto yohlobo lweToyota Land Cruiser. Kube nokujahana kwadutshulwana namaphoyisa kwalimala kanzima umsolwa oyedwa kwathi omunye waboshwa engenamyocu.
Abagilwa abese beqolwe imoto bahlengiwe njengoba bese bethunjiwe bavalelwa emotweni yabasolwa.
Ithimba lamaphoyisa libe selivundulula nezibhamu ezimbili ezingekho emthethweni kubasolwa, izinhlamvu, nemilitary grade signal jammer nokunye okuningi.
Imoto abasolwa abebehamba ngayo ibinezinombolo epletini ezingasebeli nhlobo.
Laba solwa sebexhunyaniswe noxhaxha lwamacala abalelwa ngaphezu kwa-30 okubanjwa kwenkunzi nokuphanga kwabantu izimoto kuthelawayeka.
Namhlanje (Lwesine) abasolwa balindeleke ukuthi bavele eNkantolo kaMantshi eBalfour.
