Umlingisi wakuleli osemncane (13) kwifilimu yomhlaba
Liyah Singela
IQALA ukukhonjiswa ngoMeyi 3 ifilimu iThabo And The Rhino Case okudlala kuyo phambili uLitlhohonolofatso Litlhakanyane.
Lo mlingisi osemncane (13) uzakhele udumo nogazi kwiScandal edlala kwi-etv njalo kusihlwa ngo 7:30. ULitlhohonolofatso ulingisa indawo kaTibi.
Lengqophamlando yefilimu edlala ihora nemizuzu engamashumi amane nanye izokhonjiswa kuqala eNorth America naseCanada.
Kule filimu elungele ukubukwa yiwo wonke umuntu uThabo usuke ehlala nomalume wakhe esiqiwini eSwatini ezwenikazi i-Africa. Iphupho lakhe kusukela emncane ukuba umseshi osebenza umshosha phansi. Indaba isuka ngesikhathi kunqanyulwa uphondo lwabhejane.
Omunye umlingisi ogqamile kulefilimu uKeneth Nkosi osezakhele udumo ekulingiseni kumafilimu amakhulu.
Umalume ashaye amakhala kulapho uThabo nomngani wakhe u-Emma banquma ukuzifunela mathupha abenzi bobubi kwazise bayabathanda obhekane nezilwane jikelele.
Leli bhungu elisenlincane liqale kwiScandal ngonyaka ka-2018, kwathi ngo-2022 lahoxa ekulingiseni kwaba nokukhala kubalandeli bakhe ezinkundleni zokuxhumana. Kwathi ngonyaka owalandela wabuyiswa.
Ngaphandle kweScandal uLitlhohonolofatso useke walingisa kwifilimu iRding With Sugar eyayidlala kwiNetflix.
Khonamanjalo isifundazwe sakwaZulu-Natal sibhekene nenkinga yokubulwa kobhejane. Lokhu sekuholele ukuthi Ezemvelo Wild Life esiqiwini esiseHluhluwe bathathe isinqumo sokuthi bazinqumele bona izimpondo zobhejane.
