Amaphoyisa abulele umsolwa obenukwa emacaleni abucayi
Sihle Mkhize
Osolwa ngokuba yilunga lezigelekeqe zeWest eKZN uthelwe phansi ngenhlamvu amaphoyisa eNanda.
Leli bhungu kubikwa ukuthi lineminyaka ephakathi no-20, kanti bese likhathazile linukwa emacaleni okuphanga kuhlonyiwe namanye abucayi.
Lo msolwa ubhadanywe Inanda SAPS Task Team neSAT Enforcement manje ekuseni esahuqa ubuthongo endlini eyikamelo elilodwa eMzomusha.
Ngokusho kwe-eNCA uzame ukudubula kuqala kwabe usezimbele igodi lethuna amthela phansi ngenhlamvu amaphoyisa.
Kube sekutholakala isibhamu se-9mm kuyena.
Ezinsukwini ezinhlanu ezedlule iPurpose ibike ngobumayemaye eKZN kudutshulwa izinswelaboya ezimbili kuzosa kube uLwesine.
Laba basolwa bazimbele igodi lethuna ngokubhekana ngqo namaphoyisa eVurulam, eThekwini.
La madoda abemataniswa nokubulawa kwabantu abane ekuqaleni kwalo nyaka.
