Amabillions kuthuthukiswa ingalasizinda emgaqweni
Sindiswa Nxumalo
Isikhulu sakwaSANRAL uMnuz Trevor Zumani umemezele uchungechunge lwezinhlelo zokuthuthukisa ingqalasizinda yemigwaqo.
Kuhloswe ukunciphisa ukuminyana kwezimoto, ukuthuthukisa ukuhamba, nokukhuthaza ukukhula komnotho edolobheni iTheku.
UZumani ekhuluma esithangamini sabezindaba esibanjwe ngoLwesihlanu, eDurban Botanic Gardens, nezikhulu zikaMasipala zichaze ngezinhlelo zokuthuthukisa iTheku.
Okuseqhulwini kuxoxwe ngakho kube ukuvuselelwa komgwaqo okuyingxenye ye-Strategic Integrated Project 2 (SIP2).
Lolu hlelo lukazwelonke luhlose ukuthuthukisa ukusebenza kahle kwezokuthutha nokusekela ukukhula komnotho.
Izikhulu ziveze ukuthi ukukhula komnotho waseThekwini kuhloswe ukukhuphula kube ngu-4% ngokwenza ngcono ingqalasizinda nokunciphisa izithiyo zokuthutha.
Ingxenye ebalulekile yohlelo lokuthutha kuleli dolobha yinkontileka ye-N3 Toll Concession, okuyisivumelwano seminyaka engama-30 esaqala ngo-1999 siphele ngo-2029.
Le nkontileka ihlanganisa uhlelo lwamakhilomitha angu-415 emgwaqweni uN3, ongomunye wemizila ematasa kakhulu yezimpahla eNingizimu Afrika.
Nokho, lo mgwaqo usabhekene nezinselelo zokuminyana kwezimoto, ikakhulukazi ohlangothini oluya ePietermaritzburg, lapho ukuhamba kwezimoto okuningi kudala ukubambezeleka.
Kuphinde kwagqanyiswa izindawo ezibhekene nengcindezi emgwaqweni uN2, ikakhulukazi nezindawo ezifana naKwaMashu nase-Isipingo.
Lezi zindawo zibhekwe njengezidinga ukulungiswa ngokushesha ngenxa yokuminyana kwezimoto nokungasebenzi kahle kwenetwork.
Emgwaqweni uN2, kuthuthukiswa ibanga elingamakhilomitha angu-55 kusukela eLovu River eSouth Coast, izigaba zomsebenzi ezingu-11 ezilinganiselwa ku-R19 billion. Kulezi, izigaba ezimbili seziqalile ukwakhiwa, nezibiza u-R6.6 billion.
Ngakolunye uhlangothi, uN3 uthuthukiswa ebangeni elingamakhilomitha angu-80 phakathi kwePietermaritzburg neTheku.
Le phrojekthi ihlanganisa izigaba zomsebenzi eziyi-15 ezilinganiselwa ku-R33 billion.
Izindawo eziyisithupha esezisebenza njengamanje ngezenani elingu-R22.8 billion, kanti ezintathu seziphothuliwe ngenani elingu-R8 billion.
I-EB Cloete Interchange, nayo eyindawo ebalulekile ohlelweni lwemigwaqo eThekwini, iyathuthukiswa kakhulu.
Le phrojekthi ihlanganisa abalingani abahlukene, okubalwa kubo iX Engineers ephethe ukuqapha ukwakhiwa, iSNA Consulting Engineers ephethe umklamo, kanye neBase Major/CSC njengonkontileka omkhulu.
Sekuqashwe ama-SMME angu-58 njengabalingani bokwakha, kugxilwe kakhulu ekubandakanyeni abantu bendawo.
Kulawa, angu-21 aphethwe ngabesifazane abansundu kanti angu-15 aphethwe yintsha yabassundu, okukhombisa ukuzibophezela kukaMasipala ekuthuthukiseni amathuba kanye nokukhulisa umnotho wendawo.
Izikhulu ziphethe ngokuthi lezi zinhlelo zokuthuthukisa imigwaqo azigcini nje ngokunciphisa ukuminyana kwezimoto, kodwa zihlose ukuguqula iTheku libe ungqa phambili kwezomnotho.
