Injabulo ibuzwa ePhefeni inqoba kulandelana
IKaizer Chiefs ijabulise abalandeli inqoba ngo 1-0 ishaya iRichards Bay FC emdlalweni wayo wesithathu weBetway Premiership.
Lo mdlalo bewuseFNB Stadium ngoLwesibili ebusuku kanti bewuhehe izinkumbi zabalandeli abaphume enkundleni behleka bodwa.
UThabo Cele udlale ibhola elihle waoqokwa njengomdlali ovelele kulo mdlalo – uthe inhloso yabo wukuphendula iFNB Stadium indawo la amanye amaqembu ezofika eqhaqhazela uma ezodlala khona.
Bese kuwumdlalo wesibili Amakhosi ewunqoba eFNB Stadium, kanti omunye awunqobela ekuhambeni eKapa njengoba esenamawini amathathu manje.
“Bekungewona umdlalo olula, kodwa besivele sikulindele lokho. Noma kunjalo, inhloso yethu bekuwukuthola amaphuzu amathathu.
“Besiwadinga kakhulu ngoba azosisiza ukuthi sikhule, aseneze sizethembe ukuze sinqobe neminye imidlalo ezayo,” kusho uCele ozalwa KwaMashu.
“Uma udlala kwiKaizer Chiefs, kuhlezi kubhekwe lukhulu kuwe. Kithi, ukuze sikwenze lokho okubhekiwe kumele sizibekele ezethu izinhloso.
“Lokho kwenza ukuthi sihlezi siwakhipha wonke amangwevu ukuze sinqobe imidlalo,” kuqhuba lo mdlali wasesiswini.
“Kubalulekile ukuthi senze iFNB ibe yindawo okungabuyi lutho kuyo. Kumele sikwenzele labantu abaphuma ngaso sonke isikhathi bezoseseka.”
IChiefs izobadinga baphume ngobuningi abalandeli emdlalweni olandelayo njengoba izokwamukela iMamelodi Sundowns kuyo le nkundla yayo yasekhaya.
Ukunqoba kwiRichards Bay kuyenze yaqhubeka nokuhlala phezulu – isendaweni yesibili ngemuva kweSekhukhune United kwilogi.
Isiyonke imiphumela yangoLwesibili ebusuku ihambe kanje: Chippa 1-4 TS Galaxy; Orbit 0-3 Sekhukhune; Chiefs 1-0 Richards Bay; Durban City 1-1 Arrows; Siwelele 0-1 Polokwane City.
Lisenethini.co.za
NB: Marketing & Advertising WhatsApp/Call-073 062 1169
