Uboshwe esahuqa ubuthongo obanjwe nezinhlokohlela
Liyah Mseleku
Uboshwe esazihuqela ubuthongo owesilisa (42) obhadanywe nezibhamu ezine nezinhlamvu kwaNongoma, KwaZulu-Natal.
Kuthiwa amaphoyisa ophiko LweZululand District Task Team neCrime Intelligence bancinzwe indlebe ilunga lomphakathi elithile kwaGwabe.
Kuthe uma kucutshungulwa ulwazi amaphoyisa aphuma inqina nebala umsolwa bamdadama ezintatha ngoMgqibelo.
Ngesikhathi epequlula amaphoyisa indlu yonke athole umjojantaba we-303 nesipopolo sinamathiselwe, umshini ozishintshayo i-AK47, i-Uzzi ne9mm pistol.
Zonke lezi zibhamu zivundululwe ngaphansi kombhede abelele kuwo.
Umsolwa uhluleke wancama ukuveza ubufakazi bezincwadi bokuphatha lezi zibhamu.
Kubhadanywe kwaboshwa indoda eneminyaka engu-49 ubudala KwaMakhutha, eningizimu yeTheku nama-AK47
NgoJune kubhadanywe kwaboshwa indoda eneminyaka engu-49 ubudala KwaMakhutha, eningizimu yeTheku nama-AK47.
Kutholwe nezibhamu ezincane nezinhlamvu.
Lo wesilisa uboshwe ithimba le-Economic Infrastructure Task Team (EITT) ngoLwesibili ebusuku.
ISAPS ngokubambisana namaphoyisa kaMasipala weTheku athole umkhondo ngezingede zawo ukuthi lo wesilisa uhlome uyingovolo.
Amaphoyisa abe asemlalela unyendle atheleka engazelele nebala avuka balezi zikhali ezingekho emthethweni.
Akutholakalanga kuphela lezi zibhamu kodwa kutholwe nezinhlamvu zezibhamu ezahlukene.
Lezi zikhali zizothathwa ziyohlolwa ukuthi azikaze zenze yini amanye amacala ngaphambilini.
NB: Marketing & Advertising WhatsApp/Call-073 062 1169
