Owase Zimbabwe ufunelwa amacala okubulawa kwamaphoyisa

Philasande Luthuli

Asehlabe umkhosi kunona ngabe ubani amaphoyisa akuleli ukuthi uma kubonakala uJabulani Moyo waseZimbabwe afonelwe ngokushesha.

Abakwasidlodlo bakhiphe lesi sitatimende kulandela isigameko sokugqekezwa kweveni kwadutshulwa kwabulawa amaphoyisa amabili.

UMoyo kumanje ufunelwa amacala amabili okubulawa kwaWarrant Officer Sintwa, noSergeant Masenya.

Phambilini uMoyo wayeboshelwe icala lokubamba inkunzi.

Ngokwemibiko esabalele kuthiwa NgoLwesihlanu lo msolwa ubeyolandwa ekuseni ejele eBoksburg eyiswa enkantolo eRoodepoort.

Impela uvelile enkantolo ngabo-10 ekuseni inkinga iqale esebuyiselwa emuva amaphoyisa.

Kuthiwa angene egarage lokuthela upetrol athenga okuphuzwayo.

Kuthe esamile bavukelwa abasolwa ukuba ngoshomi kaMoyo badubula amaphoyisa amabili ashonela endaweni yesigameko.

Ube esekhukulwa uMoyo ngemuva evenini yamaphoyisa washaya wachitha ngalo.

Nokho kuthiwa imoto yamaphoyisa ikwazile ukutholaka emuva kwesikhathi.

Kwenzeka lesi sigameko nje umkhankaso weMarch in March ushisa phansi kuxoshwa abokufika kuleli abangenazimvumo.

Le mpi isifake inhlabathi ephalishini lowayengumsakazi weVuma FM uJacinta MaNgobese Zuma.

Ugcine exoshiwe emsakazweni kwakhonjwa ngenjumbane uNgqongqoshe wezeMpilo uNomagugu Simelane njengeshoshozela.

Khonamanjalo, naseGoli abenhlangano i-Oparation Dudula abazibekile phansi badudula kwasani okuleli ngokungemthetho.

NB: Marketing & Advertising WhatsApp/Call-073 062 1169