U-Ace Ncobo ukhala ngokushushiswa okunonya

LIBUYELA eNkantolo ngomhla ka-29 May icala elibhekene menenja jikelele yePremier Soccer League u-Andile “Ace” Ncobo nonkosikazi wakhe, uSalome.

Laba shadikazi bavele eNkantolo yeMantshi yaseBellville, eKapa ngoMsombuluko.

Laba bobabili babhekene namacala okukhwabanisa nokushushumbisa imali ahlobene nomnikelo ka-R15 million owawufakelwe ukuthuthukisa isikole e-Eastern Cape.

U-Ace Ncobo, owayengunompempe wamazwe ngamazwe, usolwa ngokusebenzisa budedengu imali eyayinikelwe yiPetroSA.

Umnikelo wawuyingxenye yohlelo lwePetroSA lokufukula imiphakathi ngokuyilekelela ngezinsiza.

Kwakuhloswe ngayo ukuthuthukisa izikole ezintulayo ngokuthuthukisa ingqalasizinda nezinsiza.

Ngo-2008, iGangatha Junior Secondary School yafaka isicelo sosizo lokwakha amagumbi okufundela amasha, ilebhu yesayensi nezinye izinsiza.

IPetroSA yavuma ukunikela ngo-R13 million. U-Ace Ncobo kuthiwa wathatha lo msebenzi wokwakha ngaphandle kwemvume yesikole wawuphatha ngokwakhe.

Isikole asizange simgunyaze ukuba asimele noma asiphathele lo msebenzi owawuqhubeka.

Laba bashadikazi kuthiwa basungula isikhwama esingabhalisiwe esibizwa ngeKing Gangatha Building Trust okuyiso esasisingethe le mali enikeliwe.

OKlebe bathi iPetroSA yadukiswa ngokunikezwa amaphepha omgunyathi ngokusebenza kwale mali.

I-akhawunti yephrojekthi kubikwa ukuthi yathola u-R13 million, okwathi ngokuhamba kwesikhathi yabelwa kwamanye ama-akhawunti.

Imali yezicelo zePetroSA zadluliselwa ezinkampanini eziningi ezingabhalisiwe, okuhlanganisa iGangatha Projects, i-Eseswe Projects, nesikhungo sokusiza abantulayo i-Ace Ncobo Foundation.

Amarekhodi abonisa ukuthi ezinye zalezi zinhlangano azikaze zibhaliswe ngokusemthethweni.

Kubikwa ukuthi uNcobo wayephethe ngokugcwele ebhalisiwe, iDevelopment ILE Projects Close Corporation.

U-Ace Ncobo unikezwe ibheyili ka-R50 000, kwathi uSalome wathola eka-R30 000.

Leli cala kubikwa ukuthi selineminyaka engaphezu kweshumi liphenywa.

UNcobo uphendule kwiFacebook, ebiza leli cala ngokuthi “ukushushiswa okunonya.”

Uvikele isithunzi sakhe nomkakhe, wathi yonke imisebenzi yabo isiqediwe futhi namanje isazuzisa imiphakathi.

“Siyakholelwa ohlelweni lwezobulungiswa,” ubhale kanje. “Sicela ukuvikeleka njengoba inkantolo iqhubeka nenqubo yayo.”