Zibakhalele abokufika bebanjwa nempahla ebiza R66m
Sihle Mkhize
KUBOSHWE abantu basezweni laseMalawi abakuleli ngokungemthetho betholakala nombombayi bezimpahla abangabiza uR66 million eGoli.
Lo msebenzi wenziwe ngokubambisana abeNational Counterfeit Goods Unit, Gauteng Provincial Counterfeit Goods Unit, SAPS’ Operational Response Services (ORS), Crime Intelligence, SAPS Chemical Control Unit, Commercial Crime Investigations, Department of Home Affairs, Department of Agriculture, South African Revenue Services (SARS), Customs, Brand Protectors, Crime Prevention Wardens nonogada abazimele.
Ithimba beliqonde inxanxathela yezitolo nezindawo okugcinwa kuyo impahla.
Kulapho kuvundululwe izimpahla ezibalelwa ngaphezulu kwa-190 000 okuhlanganisa izimpahla zokugqoka, izicathulo, amabhande, izinto zokugcoba umzimba, ugwayi, utshwala nokunye okuningi.
Akuphelanga lapho njengoba abakwasidlodlo bephinde bathola nophoyizeni kuzo izimpahla ezitholile.
AboMnyango wezoLimo basizile ukucubungula njengoba kuyibo abahlonze uphoyizeni obhuqabhuqa abantu uma bethenga okudliwayo ezitolo zabokufika.
NgoNovemba 23 iPurpose ibike ngodaba lokuvundululwa kwenqwaba yempahla entshontshiwe eMgungundlovu, eKZN
Kusolwa abantu baseZimbabwe abebeqashe umuzi endaweni ukugcina lezi zimpahla ezebiwe bese beziwelisa umgcele.
Le mpahla enhlobonhlobo kubalwa kuyo izinsimbini zezimoto, ifenisha, inyufomu yamaphoyisa, zingubo nokunye okuningi bekuzothuthelwa eZimbabwe naseMozambique.
Lesi sigameko sishiye abantu base Mgungundlovu, beshaqekile ukubona impahla ebingagcwala amaloli iphuma kulo muzi.
