Umunyu kungcwatshwa uGomolemo (9) owafa engozini yomdlali

BEKUNOMUNYU enkonzweni yokuphelezela uGomolemo Mavimbela (9) obengcwatshwa ngoMgqibelo.

Abantu bebegcwele phama esontweni iFaith Mission Church ku-Andrew Mapheto Drive eThembisa.

UGamolemo owayehamba nonina nenye intombazanyana (13) wafa ujuqu engozini yemoto ebandakanya umdlali weSikhukhune United uShaune Mogaila (29).

UMogaila owayeshayela imoto yohlobo lweBMW M2 washayisana mahlanze ku-Andrew Mapheto Drive eduze nase Phomolong nemoto kamama kaGamolemo.

USifiso Sikhosana ekhuluma neDaily Sun uthe unina womntwana usesibhedlela kodwa usesimweni esithembisayo.

“Ngibonga ukwesekwa esikuthole kuwo wonke umuntu owathinteka ngelesi sigameko. Siyajabula ukuthi konke kuhambe kahle namhlanje,” usho kanje.

USikhosana uveze ukuthi lo mdlali weSikhukhune akaze alubhade kubona ezokhalisana nomndeni.

Umfundisi obeshumayela utshele abazalwane ukuthi ikusasa lika Gamoleo libulawe umuntu obedakiwe.

“Le ntombazanyane ibinekusasa eliqhakazile kodwa ngenxa yomuntu obekadiwe kwashabalala konke. Siyafisa kwenzeke ubulungiswa asifisi ukuzwa kuthiwe kunobufakazi obushodayo,” usho kanje.

Ngesikhathi kwenzeka ingozi uwabaleka endaweni yesigameko kodwa wabuye wazinikela emaphoyiseni.

Emotweni yakhe kwatholakala amabhodlela katshwala nempuphu emhloshana okusolisa ukuthi icocaine.

UMogaila uzovela okwesibili enkantolo ngoFebhuwaru 4 ngonyaka ozayo ebhekene namacala okushayela budedengu, okubulala okungehloso phakathi kwamanye abekwe wona.

Wathola ibheyili kaR20 000 enoantolo kaMatshi eThembisa ngoNovemba 1.