Umsakazi woKhozi FM uZimdollar ufusegise uMthandeni wamphuca nombhobho
Liyah Duma
Umsakazi woKhozi FM uZimiphi “Zimdollar” Biyela uqhumise ufusegi esteji ethuka uMthandeni Manqele esacula wamphuca nombhobho.
UZimdollar ubekwenza lokhu emcimbini iMother of All Maskandi Festivals, ePeoples Park, eThekwini, izolo ebusuku. Onogada babe sebemkhipha ngoshova namagidangoma wakhe.
Lesi sehlakalo sishiye abaningi bebambe ongezansi abanye bejikijela lo msakazi ngamabhodlela esteji benziwa intukuthelo.
Lo mcimbi ubuhlelelwe abaculi baMaskandi njengoba bebencisana kumklomelo weQuantum.
“Fusegi, Sanibonani, ngifuna ukunitshela ukuthi kwenzakaleni, lalelani la iMother of All le, asizodlala uMthandeni,” usho kanje uZimdollar esteji abantu bamjikijela ngamabhodlela.
Enaba kabanzi lo msakazi usuphelile umcimbi uthe uMthandeni akawuhloniphi umsebenzi.
“UMthandeni ubeqashwe njengomuntu onamava ukuzobusisa lo mcimbi, isikhathi abekufanele angene ngaso esteji u-7 kodwa washaya wadlula. Kuthe sekushaye no-9 sabona kuncono sifakele abaculi esize ngabo nabafake izimali zabo kulo mncintiswano.
Ufike sekudlule isikhathi, ekuqaleni ubengasazibambi izingcingo nemenenja yakhe uMasondo. Esifika wazisiwe ukuthi akahoxe wavuma. Ube esephuma ngale nabangani bakhe bakhipha uDJ kwangena yena. Angikhathali noma ngabe uyinsizwa engakanani ufusegi ufusegi nje.
UMthandeni uvuke ekuseni wabhala kuFacebook ukuthi: “Mthandeni omnene othobe ngenhliziyo♥♥♥”
Sekuwumlando nokho ukuthi iQuantum lihambe noGatsheni wodumo lwengoma iHit After Hit.
