Umlando uNkotha ebhakuzisa inethi kowokuqala
Kuyachwaza ezinkundleni zokuxhumana abalandeli baMohau Nkota nabathandi bebhola eNingizimu Africa bemjabulela ukushaya igoli lokuqala le-Al Ettifaq.
UNkotha uyibhakuzise inethi ngesikhathi inqoba ngo 2-1 ihlula i-Al Kholood emdlalweni wokuvula isizini weSaudi Pro League e-EGO Stadium ngoLwesine.
Lo mdlali osuka kwi-Orlando Pirates ushaye igoli ngomzuzu wesikhombisa ngaphambi kokuthi i-Al Kholood ilinganise ngoJohn Buckley sekusele imizuzu eyisishiyagalolunye kuyiwe ekhefini.
Owayengumdlali we-Liverpool uGeorginio Wijnaldum ube esebuyisela i-Al-Ettifaq phambili ngemuva nje kwehora ukuze bagcine benqobile.
UNkota uwudlale wonke lo mdlalo obekungowokuqala osemthethweni kusukela asayina kule kilabhu.
Futhi kube wusuku olungenakulibaleka kuNkota, oqokwe eqenjini lokugcina leBafana Bafana elizodlala imidlalo yokuhlungela iNdebe yoMhlaba ka-2026 neLesotho neNigeria.
Udlale okokuqala eqenjini lakhe lesizwe emdlalweni wobungani wamazwe ngamazwe ngoJuni neTanzania nedlala neMozambique.
Manje usezodlala umdlalo wakhe wokuqala wokuncintisana kwiBafana uma uBroos emkhetha eqenjini azoqala ngalo le midlalo ezayo.
Ukwenza kahle kwakhe ngoLwesine kukhombise ukuthi uNkota usesheshe wayijwayela impilo yaseSaudi Arabia futhi angaba nomthelela kalula naseqenjini lesizwe.
Njengoba eqale umkhankaso weSaudi Pro League ngegiya eliphezulu, lokho kuzomfaka umfutho nokuzethemba uNkota ngaphambi kokuza eqenjini lesizwe.
Manje ulibangise eNingizimu Afrika la ezosebenzela khona iqembu lesizwe ngaphambi kokubuyela kwi-Al Ettifaq, ezobhekana ne-Al Ahli ngoSepthemba 12 ekhaya.
NB: Marketing & Advertising WhatsApp/Call-073 062 1169
Lisenethini.co.za
