Owokufika udutshulwe ikhehla ebamba inkunzi isitolo
Owesilisa wasendaweni ubeya esitolo wavele wazithela kumadoda amathathu abehlome eyizingovolo, ephanga isitolo
Siwe Shozi
UDUTSHULWE ikhehla wabanjwa esibhedlela owesilisa (27) odabuka eMalawi ebamba inkunzi isitolo eMaidstone, kwaZulu-Natal. Lesi sigameko senzeke izolo kusihlwa.
Kuthe kusenjalo, owesilisa wasendaweni obeyothenga esitolo uvele wazithela kumadoda amathathu abehlome eyizingovolo.
Kuthiwa leli khasimende elineminyaka engu-69 ubudala lidonse isibhamu sohlobo lweTangfogleo 6.35 pistol zakhala.
Kube sekudubeleka kabi umsolwa oyedwa emuva kokuqathaka phansi isibhamu abehlome ngaso.
Ababili abehamba nabo bakwazile ukumtakula bamfaka emotweni yohlobo lweBantam Bakkie bayomlaxaza esangweni lomtholampilo waseThongathi.
Naleyo moto emlaxazile ibingenazo izinombolo.
Kusize unogada wabiza abahlengikazi.
Inkampani yonogada iReaction Unit South Africa (RUSA) ifike endaweni yesigameko ngokuphazima kweso.
Ifike yasithatha isibhamu sika msolwa, nokuthe uma sihlolwa kwatholakala ukuthi ithoyizi. Ofakazi bakwazile ukunika umkhondo labo nogada. Emuva kokuhlatswa ngemibuzo umsolwa ugcine eselihlanza iqiniso. Kube sekuba ukuboshwa kwakhe elele embhedeni.
