Lizinikele iphoyisa lesifazane elisolwa ngokubulala umyeni nentombi
SIHLEHLELE uLwesithathu mhla ka-12 Mashi isicelo sokulalelwa kwebheyili kaSergeant Nyiko Nyathi (42) obhekene nezinsolo zokubulala umyeni wakhe nomunye wesifazane.
Leli phoyisa elisebenza esiteshini samaphoyisa eBushbuckridge lizinikele kusona lesi siteshi, lavela enkantolo kaMantshi ngosuku olufanayo kuso lesi siteshi.
Kubikwa ukuthi uMnuz Lawrence Alba Masheho (44) wahlaselwa ngamadoda angaziwa ehlomile ekhaya eBoikutsong, eBushbuckridge.
Lamadoda amduna itekisi iToyota Quantum nemoto encane iFord Escort, abe eseyamthumba.
Izimoto zombili zasetshenziselwa ukufinyelela emzini othile eZoeknoeg.
Endlini afica uNksz Victoria Lebyane (44) okunikwa ukuthi wayengumngani kaMashego wesifazane, waficwa ephethe amakhadi akhe uMashego.
UMashego wakhuthuzwa imali ebalelwa kuR4000 engukheshi namakhadi asebhange wakhe, waphinde wadubuleka kabi edutshulwa ngomunye wabasolwa.
Uphenyo lwamaphoyisa akwaSAPS yilo oluholele ekuboshweni kwabasolwa abane.
Oyedwa wabasolwa walivuma icala wagwetshwa iminyaka ewu 77.
Yilolu phenyo olwaholela ekutheni uSergeant Nyiko Nyathi abe ngomunye wabasolwa ekubulaweni kukaMashego noLebyane.
Kwesinye isigameko ngenyanga edlule sibike ngokugwetshwa iminyaka engu-20 ebhadla ejele uSizwe Ngema (28) obeyiphoyisa likaMasipala weTheku.
UNgema wagwaza wabulala uConst Bianca Khuzwayo obeyintombi yakhe nabesebenza naye esiteshini esise-Albert Park, eThekwini, ngoMarch wonyaka owedlule.
UNgema wavela ngoLwesine eNkantolo eNkulu yaseThekwini, lapho avume khona wonke amacala wakhe wabe esegwetshwa.
Ukubulawa kwaBianca kwaba undabuzekwayo ngemuva kokuthi uNgema asabalalisa enkundleni yokuxhumana uFacebook ivideo eyayikhombisa imizuzu yokugcina kamufi.
