Lishiye kukhalwa igoli likaMkhize e-Orlando Stadium
Basale bekhala “mi” izinyembezi abalandeli be-Orlando Pirates uSiphesihle Mkhize emosha umcimbi ngegoli okuyilo elidle iBhakabhaka ngomzuzu ka-48 esiwombeni sokuqala.
Yize iPirates beyiwakha amathuba, futhi kuyiyo ephethe umdlalo, kodwa igcine ihlulekile ukuthola okungenani igoli lokulinganisa.
Usale ekhala ngamathuba ‘amahle’ ezakhe ezidlale ngawo umqeqeshi we-Orlando Pirates u-Abdleslam Ouaddou bethola induku ka 1-0.
IPirates iphoxe abalandeli bayo abebephume ngobuningi e-Orlando Stadium njengoba kube yiSekhukhune ephume namaphuzu agcwele.
“Siphoxekile impela. Umdlalo besiwuphethe futhi sakhe amathuba amahle impela futhi abalulekile.
“Kodwa ke linjalo nje ibhola, uma ungawasebenzisi amathuba akho, akuhambi kahle,” kusho u-Ouaddou ngemuva komdlalo.
“Imbangi ivele ithole ithuba elilodwa bese ikujuqa ngalo. Kodwa kumele siqhubeke nokuzethemba nokukholelwa kwesikwenzayo”
“Besifuna ukunqoba umdlalo wokuqala ekhaya, kodwa akusihambelanga kahle… Kodwa kumele siqhubeke nokukholwa.”
ISekhukhune ifike i-Orlando igcwele abalandeli abebecula kuwumcimbi omnandi, belindele ukuthi iqembu labo lizoqhubeka la ligcine khona ngempelasonto edlule.
NB: Marketing & Advertising WhatsApp/Call-073 062 1169
