Libuyele efomini iPresident lama-2k lingcwaba AmaZulu
Ubuyele emgqigqweni wakhe umdlali we-Orlando Pirates uRelebohile Mofokeng njengoba ephinde waba yiqhawe laleli qembu ngoLwesibili ebusuku.
URele Mofokeng nguye oshaye womabili amagoli iPirates ishaya AmaZulu FC ngo 2-0 emdlalweni weBetway Premiership obuseMoses Mabhida Stadium.
Lo mphumela ukhuphulele iPirates esicongweni seligi kanti isishiya iMamelodi Sundowns ngamaphuzu amathathu.
Nokho luselude ukhalo olusazohanjwa njengoba kusasele imidlalo engu-15 esazodlalwa kwiligi.
URele Mofokeng uphinde waqokwa njengoMdlali obeVelele okwesibili imidlalo ilandelana.
Ubuzwe ngegoli lakhe lesibili. Ubededele ishodi kodwa layoshaya ipali, labe selibuya lazishayisa kunozinti woSuthu labe selibuyela enethini.
“Yigoli elibe umkhonto odla ekhaya kanjani? Yimi nje engikhahlelile. Kodwa ke akunandaba, ngoba nje sithole igoli kulungile,” kusho uMofokeng.
Kwelokuqala, uMofokeng ulidle ngekhanda – obekungokokuqala eshaya igoli kanjalo.
“Konke kuncika ekutheni ulilindela kanjani ibhola,” kuchaza uMofokeng ngaleli goli lakhe.
“Ngibone ibhola liza, ngathi uma ngiqalaza eduze kwami, ngabona ukuthi ngingedwa.
“Ngibone kuyithuba lokushaya igoli ngekhanda okokuqala nje kusukela ngaqala ukudlala.”
Njengoba esebuyele efomini yakhe emenze isithandwa nesethenjwa ebholeni lakuleli, sekuzophinde kulindelwe imilingo kuMofokeng.
Vele ke useke wakhombisa naphambilini ukuthi uyakwazi ukuyigila, futhi lo mgqigqo wakhe ubuye ngesikhathi esihle sekubhekwe entanjeni kulo mjaho weligi.
Lisenethini
NB: Ad placement WhatsApp/Call 073 062 11 69
