Kukhonjwa unozinti iBafana ilandela ngemuva i-Uganda

Bahle Mkhize 

IMINWE eminingi ikhomba unozinti weBafana Bafana, uVeli Mothwa, njengoba engenelwe amagoli amabili akhahlelwe abadlali abakude nepali.

Lo mdlalo obunzima ububanjelwe e-Orlando Stadium iBafana ibambana ngo 2-2 ne-Uganda emdlalweni wokuqala kweyokuhlungela i-Afcon ka-2025.

UMothwa uqale ngaphambi kukaRichard Goss noSipho Chaine.

Unozinti ojwayele ukuqala imidlalo, uRonwen Williams ubengekho kulo mdlalo ngenxa yokulimala.

IBafana iqale kahle, uLyle Foster eshaye igoli ekuqaleni kwesiwombe sokuqala.

I-Uganda iphume ngamandla esiwombeni sesibili kwayiyo elawula umdlalo.

UDenis Omedi noRogers Mato bashaye amagoli amabili asheshayo ukushintsha umdlalo.

IBafana ibuyele emdlalweni sekubalwa imizuzwana umdlalo uphele, ilanyulelwa uThalente Mbatha ongene umdlalo usuyophela.

Umqeqeshi uHugo Broos kudingeke ukuthi enze izinguquko ngenxa yokulinyalelwa izethenjwa zakhe.

UMothobi Mvala ubengekho naye ngenxa yokulimala, kanti uGrant Kekana yena usamisiwe.

UBroos uqale ngabadlali abasha maphakathi emuva okungoRushwin Dortley noSiyabonga Ngezana.

Yize bezamile ekuqaleni komdlalo, kodwa kugcine kuvela ukuthi abajwayelene ngokuqhubeka komdlalo ikakhulukazi ngesikhathi i-Uganda ifaka ingcindezi.

IBafana isizobheka ukubuyisa ukuzethemba kwayo uma isivakashele iSouth Sudan ngoLwesibili.