Kuhlatshwa uN3 owakhiwayo ngengozi yamaloli
KULIMALE kanzima abantu kushayisana amaloli emgaqweni uthelawayeka uN3.
Abethimba leRoad Traffic Inspectorate (RTI) bathi ukulungiswa kabusha komgwaqo uN3 sekudale inyakanyaka.
UNgqongqoshe wezokuthutha nokuhlaliswa kwabantu uSiboniso Duma usexolisule kubantu abavakashele iKwaZulu-Natal ngokubhajwa kwabantu ebusuku nasekuseni.
UDuma uthi uhlanganile neSouth African Freight Association, SANRAL, Road Traffic Management Corporation nabezinkampani ezithwala amaloli uma efile.
Uthi bavumelane ngokuthi basebenzisane ngokubambisana ukulwa nesiminyaminya esidalwa ukushayisana kwamaloli.
Amaloli athwele amakhemikhali nakawk abandekanyayo ayosuswa ngokuphazuma kweso emgaqweni ulubalekela isiminyaminya.
Ukukhandelwa kwamaloli emgaqweni kuhlonzwe njengenye yezinto ezidala isiminyaminya.
Kuzobanjwa imihlangano ehlukene noMnyango we-Economic Development, Tourism and Environmental Affairs, Transnet, Port Operators, Dube Trade Port, Richards Bay Industrial Development Zone, eThekwini Municipality, Umhlathuze Municipality, nabanye ukuzama ukuthola ikhambi.
Khonamanjalo, kuboshwe abayisikhombisa okubalwa kubo nabakufika abakuleli ngokungekho emthethweni kwisivimbamgwaqo sokuqikelela ukuphepha kulesi sikhathi sePhasika eMtubatuba.
Lesi sivimbamgwaqo ebesisemgaqweni onguthelawayeka u-N2 besiholwa yiMeya kaMasipala Inkosi uMtubatuba, uMnuz Mxolisi Mthethwa, ngokubambisana nezikhulu zamaphoyisa, nezisebenzi zoMnyango wezaseKhaya. Bekuhloswe ngaso ukukhuthaza abashayeli ukuba bahambe ngokucophelela, bagcine imithetho yomgwaqo.
Usuku lugoqwe ngokukhishwa kwamathikithi okungayigcini imithetho yomgwaqo awu-45, kwaboshwa abokufika abakuleli ngokungemthetho abawu-5 kanye nababili abebeshayela bephuze beqisa ezinkambeni zikaFaro.
