Kubanjwe icocaine engabiza R80 m echwebeni laseThekwini
Sihle Mkhize
KUSABATSHAZWA inqwaba yezidakamizwa elokhu ingeniswa kuleli njengoba ngoMsombuluko ntambama kubanjwe icontainer echwebeni laseThekwini.
Kubikwa ukuthi lezi zidakamizwa bezizodayisa uR80 m emigwaqeni yakuleli.
Ngokwamaphoyisa athi ancinzwe indlebe ngalokhu kuthiwa akagade impahla esuka eBrazil ngasekuqaleni kwaNovemba ithwele icocaine ezishaya sabhontshisi.
Iziphathimandla zibe sezibheka ngelokhozi izimpahla ezifikayo echwebeni laseThekwini nebala icontainer esolwayo yathathwa ukuyohlozwa eSouth Coast Road eBluff.
Ngesikhathi lupeqululwa kuvundululwe izikhwama eziyisishiyagalombili zecocaine. Ngokwamaphepha uhambo lwale container belubheke eGoli. Nokho uphenyo lusaqhubeka ukuthola abanikazi balezi zidakamizwa.
Kwenzeka lesi sigameko nje ngoMsombuluko iPurpose ibike ngokuboshwa kwabantu basezweni laseMalawi abakuleli ngokungemthetho betholakala nombombayi bezimpahla abangabiza uR66 million eGoli.
Lo msebenzi wenziwe ngokubambisana abeNational Counterfeit Goods Unit, Gauteng Provincial Counterfeit Goods Unit, SAPS’ Operational Response Services (ORS), Crime Intelligence, SAPS’ Chemical Control Unit, Commercial Crime Investigations, Department of Home Affairs, Department of Agriculture, South African Revenue Services (SARS), Customs, Brand Protectors, Crime Prevention Wardens nonogada abazimele.
Ithimba beliqonde inxanxathela yezitolo nezindawo okugcinwa kuyo impahla.
Kulapho kuvundululwe izimpahla ezibalelwa ngaphezulu kwa-190 000 okuhlanganisa izimpahla zokugqoka, izicathulo, amabhande, izinto zokugcoba umzimba, ugwayi, utshwala nokunye okuningi.
