Isililo kushona obesakaza oKhozini FM
Phila Luthuli
KUKHALWA nxazonke ngokudlula emhlabeni kwaphuma langa sikothe wentokazi ebisizakhele udumo endimeni yomculo kamaskandi, uZamaweza “Zulu Glamour” Mthalane (35).
Umufi udlule emhlabeni esibhedlela iPixley kaSame emuva kokukhala ukuphathwa ikhanda.
UZulu Glamour ubezalwa eMabomvini, KwaMaphumulo.
Umfowabo kamufi uSphiwe Mthalane ukuqinisekisile ukudlula emhlabeni kadadewabo.
Ucashunwe kwabezindaba ethi umufi ubekhala ngekhanda kusukela emasontweni amabili edlule.
“Ungifonele wangazisa ukuthi uphethwe ikhanda ngamluleka ukuthi akaye esibhedlela nokuyinto ayenzile. Uye emtholampilo bamdlulisela esibhedlela nokuyilapho etshelwe khona ukuthi unesifo se meningitis. Ukugula kumqinisele wagcina ngokuphelela khona esibhedlela,” kulandisa uMthalane.
Umfowabo kamufi uthe bebesalindele lukhulu kadadewabo njengoba ubebonakala eza kabi kwezokungcebeleka
Lentokazi ibisizakhele udumo nangokupheka abaculi bakamaskandi ngemibuzo kuYouTube Channel ebizwa ngoMbuso Wamaciko TV.
Ngaphandle kokupheka abaculi ubebuye athule uhlelo emicimbini ehlukahlukene okuhlanganisa kuyo neGcwalisa Spring Picnic.
Umsakazi woKhozi FM uTahatha Ngobe naye ubhodle emswaneni.
“Awu yaze yabuhlungu indaba yale ntokazi yakwaMthalane, bekuhlale kumnandi ukusebenza nayo uma siphethe uhlelo estage. Ukufa kuyashaqisa bakithi, asisoze sakwejwayela ngoba asidalelwanga khona,” kuphawula uTahatha.
Abantu abaningi bazomkhumbula ebambe iqhaza kuSigiya Ngengoma engosini eyaziwa ngokuthi Ezisegudwini.
Akagcinanga lapho njengoba nasohlelweni lomculo obelusakazwa wuTshatha Ngobe noNtombee Mzolo kuMzansi Magic Music, iYash’Ingomau begila ezibukwayo.
Umndeni uzohlangana namhlanje (Msombuluko) ukuhlanganisa amakhanda baphune nosuku lomngcwabo.
