Odilikajele kobedlwengula amawele awazalayo
ZILAHLWE olwandle izikhiye kugwetshwa indoda eneminyaka engu-54 ubudala, odilikajele ababili yiNkantolo yesiFunda yaseMount Fletcher, Eastern Cape.
Le ndoda ibisolwa ngokudlwengula amadodakazi ewazalayo angamawele izikhathi ezingaphezu kweminyaka eyishumi.
Ngokombiko weSolezwe inkantolo iphinde yagweba umsolwa iminyaka emihlanu emacaleni amabili okunukubeza ngokocansi.
Umsolwa akazodalulwa ukuze kuvikelwe abagilwa. Okunye okuvelile wukuthi elinye lamawele liphila ngokukhubazeka ngokomqondo.
Inkantolo izwe ukuthi unina wabagilwa washona ngo-2011, amantombazane amabili, ngaleso sikhathi ayeneminyaka engu-11 ubudala, ahlala noyise ekhaya.
Uqale ngokubathinta ngendlela engafanele ezithweni zabo zangasese ngaphambi kokudlwengula ephindelela iwele elilodwa.
Ngo-2019, elinye iwele lathola umsebenzi kwelinye idolobha, lokho kwanika umsolwa ithuba lokudlwengula iwele elikhubazekile elalisele ekhaya.
Iwele ebelisele noyise litshele udadewabo omdala ukuthi emuva kokuqashwa kwewele lakhe, uyise waqala ukulidlwengula.
Kwabizwa umhlangano womndeni, ubaba wazivuma izono zakhe, okwaholela ekuvulweni kwecala ngumalume wamawele, wabe eseboshwa kanjalo.
Ngesikhathi kuqhubeka ukuqulwa kwecala, waliphika wathi ingane ekhubazekile yayimqambela amanga ngoba yala ukuthi ayigcinele imali yesibonelelo sikahulumeni sokukhubazeka.
Umshushisi woMbuso, u-Advocate Thamsanqa Vinindwa, ubehola ubufakazi bomunye womphathi wewele, udadewabo omdala wewele, umalume kanye nabo abagilwa.
Ephekwa ngemibuzo ummangalelwa, uhlulekile ukuchaza isizathu sokuthi kungani izingane zakhe zonke zimsola ngaleli cala.
