IMK Party igawula iyaphindelela kubuholi bayo

Bahle Mkhize 

KUDUMA amakhanda kwabaningi ngomdlalo wepolitiki njengoba iMK Party ixoshe uMnuz Jabulani Khumalo okunguyena owabhalisa leli qembu. UKhumalo ulandela ezithendeni uBonginkosi Khanyile obengumxhumanisi kuzwelonke ophikweni lwabantu abasha naye abamfake amasondo.

Ubuholi bukazwelonke bukhiphe isitatimende buveza ukuthi buqaphele imizamo yabathile abafuna ukudala uqhekeko kuleli qembu.

IMK Party iya okhethweni ifolosa ngoMnu Jacob Zuma ozobe engubuso balo.

Phakathi kwamagama akhishwe iMK Party ukuthi awasadingeki eqenjini kubalwa uBheki Khumalo, Lebo Moepeng, Rochelle Davidson odume ngogogo Mahlalela.

Kwenzeka lokhu nje ngoLwesine eNkandla bekushikisha ufudu uMnuz Jacob Zuma evela kubantu egiya kulandela imibiko yokuthi ubegula. Amalungu ale nhlango angosomabhizinisi anikele ekhaya lalo mholi eyokwethula iloli nezimoto abahlose ukukusebenzisa njengoba beqinisa izinhlelo zabo zokukhankasela ukhetho lungenyanga ezayo.

Leli qembu linezinkinga selokhu labunjwa, ubufakazi balokho ukuphuma lingena kwalo ezinkantolo.

Muva nje iMK Party isanda kuwina icala eNkantolo eNkulu yaseThekwini. IMK ibilwelwa ukusebenzisa leli gama nelogo i-ANC yona yayithi konke ngokwayo. IMK ithe isajubulela ukunqoba uNobhala we-ANC wamemezela kwabezindaba ukuthi bahlela ukulidlulisa udaba. IMK yayalelwa inkantolo ukuthi ifake amaphepha ngoLwesine.