IBMW ivunywe izinombolo ngokuhamba phambili
IBMW iyaqhubeka nokuqengqeleza phambili esigabeni sezimoto zomtakabani i-premium segment njengoba iphethe u-40.6% wemakethe ngokwezibalo ze-Naamsa.
Okuqaphelekayo wukuthi iBMW Group isanda kwethula iMINI Aceman neMINI John Cooper Works kuleli.
IMINI ithole u-6.2% wemakethe kwathi izithuthuthu iBMW Motorrad yona yabamba u-43.0% wemakethe.
Isikhulu sakwaBMW South Africa, uPeter van Binsbergen, uthi izibalo zokudayisa kwabo ngekota yokuqala yonyaka ziyabagqugquzela.
Uthi bazoqhubeka nokufaka isandla embonini yezezimoto eNingizimu Afrika ngomuso.
Empumelelweni yabo babeke phambili iBMW X3 eyethulwe ngo-Okthoba nyakenye.
Okuhle ngayo wukuthi ikhiqizwa efemini yale nkampani iPlant Rosslyn ePitoli, bese idayiswa kuleli nakwamanye amazwe.
Ukuthakaselwa kwayo kwenze kwabuyiselwa i-shift yesithathu yokukhiqiza.
I-shift ngayinye kubhekwe ukuthi ikhiqize izimoto ezilinganiselwa ku-110.
Kuzokhumbuleka ukuthi isigaba se-premium segment singaphansi kwenkulu ingcindezi eNingizimu Afrika njengoba ukuthengwa kwezimoto ezikuso kuqhubeka nokwehla.
Ezinye zezinkampani ezikuso kubalwa i-Audi neMercedes-Benz.
Ngonyaka odlule, izibalo ezishicelelwe kwi-IOL ziveze ukuthi iBMW idayise izimoto ezingu-12 057, yalandelwa yiMercedes-Benz ngo-9 256, Audi ngo-5 511, Land Rover ngo-2 624, Volvo Car ngo-1 428 nePorsche ngo-1 258.
I-Audi isanda kumemezela ukuthi ukushuba kwesimo kuzoyenza ivale amanye amagaraji ayo. Ebelisenkabeni yeTheku livalwe ngenyanga edlule. Kuvela ukuthi elisePinetown nalo liyagcina ukusebenza kule nyanga.
IVolvo Cars nayo yaveza ukuthi inciphisa isibalo samagaraji ayo.
Isolezwe
