I-ANC ihlekise ngeMK Party kugwetshwa uDkt mbumbulu
Bahle Mkhize
UPHENDUKE inhlekisa uLucky Montana ofungiswe njengelunga elimele iMK Party ephalamende ngesonto eledlule.
Lokhu kuza emuva kokuthi inhloko yezobunjiniyela ayethula kwa-Prasa njengongoti womhlaba wonke kwezobunjiniyela bezitimela u”Dkt” Daniel egwetshiwe.
UNobhala Jikelele we-ANC, uMnuz Fikile Mbalula, oshiye uZuma wajoyina uMnuz Cyril Ramaphosa, ungomunye wabantu bokuqala abahlekise ngoMontana.
INkantolo yase-Palm Ridge Commercial Crimes Court igixabeze uMthimkhulu ngeminyaka engu-15 mayelana necala lokuqamba amanga ngeziqu zakhe.
INkantolo imyalele ukuthi abuyisele emuva u-R5.8-million kwa-Prasa yaphinde yathatha nempahla yakhe.
UMontana usethembeke kuZuma iminyaka eminingi, uphakathi kwenqwaba yababesolwa ngokudunwa kombuso asebephenduke amalungu ePhalamende eqembu le-MK.
UMontana wayethi uMthimkhulu ufunwa kakhulu kangangokuthi izinkampani zase-Germany nezinye izimakethe zangaphandle zifuna ukumqasha.
Ngenxa yalokhu, iholo lakhe lonyaka lanyuswa lisuka ku-R1.6-million laya ku-R2.8-million.
OKlebe bathi uMthimkhulu wathi uneziqu ze-Master’s azithola eNyuvesi yase-Wits kanjalo neziqu zobudokotela kwezobunjiniyela azithola e-Munich Technical University e-Germany.
Lo dokotela mbumbulu ubekwe amacala ayisishiyagalolunye okubalwa kuwo awokukhwabanisa nawokukokotela.
