Bazobhema bakholwe kubuya uShaka iLembe kuTV
ABALANDELI bomdlalo kamabonakude owanqoba imiklomelo eminingi, uShaka iLembe sebezophinde bazikholise ngawo maduze.
Le sizini entsha elindelwe ngabomvu izokhonjiswa okokuqala ngeSonto, 15 Juni 2025, kuMzansi Magic (DStv Channel 161).
UShaka iLembe uqophe umlando ngesizini yokuqala, ikhombisa ngempilo yasebunganeni nasekukhuleni kwenkosi yamakhosi uShaka.
Lo mdlalo waqoshwa ngendlela esezingeni elimangalisayo, ukuxoxwa kwezindaba okunamandla, nezigcawu zempi ezishubile.
Kwalandela iminyaka yokuqala kaShaka, imizabalazo yakhe, nohambo lwakhe lokuba elinye lamaqhawe amakhulu e-Afrika.
Lo mdlalo ubophele abalingisi abasezingeni eliphezulu, okuhlanganisa uNomzamo Mbatha omangalisayo owayedlala indawo yeNdlovukazi uNandi, uLemogang Tsipa owayedlala indawo yeNkosi uShaka.
UThembinkosi Mthembu ulingise indawo yeNkosi uDingiswayo, uWiseman Mncube walingisa indawo yeNkosi uZwide, uDawn Thandeka King walingisa indawo yeNdlovukazi uMkabayi, noKhabonina Qubeka walingisa indawo yeNdlovukazi uNtombazi.
Ukudlala kwabo kwenza umlando ocebile wombuso wamaZulu waphila, okwenza lolu hlelo lwaba yintandokazi yabalandeli ngokushesha.
Umbhali wezokungcebeleka uJabu Macdonald ukuqinisekisile ukubuya kwalezi zihlabani ezibalulekile kuTwitter (X).
“Le sizini ithembisa izimpi ezinkulu nakakhulu nokunye okujabulisayo,” ubhale kanje.
“Izigcawu zempi ezimangalisayo zilindile njengoba iqhawe iNkosi uShaka libhekene nezinselelo zayo ezinkulu okwamanje.”
Isizini yokuqala iwine kakhulu kuma-SAFTA adlule, okufakazela ukubusa kwayo.
Manje, ababukeli bamagange ukubona ukuthi isizini yesibili yona ibaphatheleni.
Ngezimpi ezidumile, izigemegeme eziphezulu, nobuso obusha, isizini yesibili izoba nkulu nakakhulu.
Isigqisethu
