Bashaywe ngesithende oMaskandi abanohlonze koweQuantum
ABAHLELI bomcimbi okuncintiswana kuwo kuMaskandi iMother of All sebekhiphe uhlu lwamagama abaculi abangavumelekile ukungenela.
Abaculi abangavumelekile ukuqokwa kubalwa uKhuzani, uGatsheni, uMfiliseni Magubane, u-Ali Mgube, uShwi, uThokozani Langa, uBuselaphi, Izingwe Zamakhize, uGandaganda noThandeka Radebe.
UZimdollar uthe laba baculi bazobe beyizimenywa ezizonandisa ngosuku lomcimbi.
UMgqugquzeli uMnuz Eric Ngobe ekhuluma neLanga uthe inhloso enkulu ngokusungulwa kwalo mcimbi ngukuthi lingabi bikho igebe ekuhlomuleni kwabaculi kwabaphumelele nalaba abasazalazayo.
Uthi ngalokhu benzela ukunikeza namanye amaciko ithuba lokuzibonakalisa kwiMother of All kuwona wonke amazinga omculo.
Kuvezwe ukuthi abalandeli bazoqoka abaculi ngokusebenzisa uhlelo lwe-email bathumele igama lomculi kwethi “Ukmafrica24@gmail.com”.
Ukuqoka umculi omthandayo, kuyavalwa ngoLwesihlanu mhlaka-21 kwephezulu.
Omunye wabagqugquzeli uZimiphi “Zimdollar” Biyela uthi banikeza abathandi bomculo okungabalandeli ukuba bazikhethele bona abaculi abafisa bangenele umbango wemoto.
Uthe kuzohlungwa abaculi abawu-50 abazomenyezelwa ngoMgqibelo, okuyibona abazovotelwa ngokohlelo lwe-sms line nayo ezomenyezelwa ngalo lolu suku.
Uthi ngesonto elilandelayo kuzosala i-Top 40 ngokwamavoti, kuphinde kusale i-top 30 okuyiyona ezobe ikowamanqamu kuze kuyofika usuku lomcimbi mhla ka-5 Aprhreli ePeoples Park Moses, Mabhida, eThekwini.
“Ukuqokwa kwabaculi kuzovalwa ngo-12 emini ngoLwesihlanu, kuyobe sekuhlala phansi ithimba leMother of All nezazi zomculo kuhlunguwe okuyibona abawu-50 abaculi ngokwamagalelo abo kwezomculo.
Kuzoqala kuqhudelane abawu-50, kusale abawu-40 ngokwevoti, kugcine kusale abawu-30.
Lezi zigaba ezintathu zizokwenzeka ngokwevoti, umculi kuzoya ngokuthi uvotelwe kanjani ukuze asale kwi-Top 40, kuya kuTop-30. Nangosuku lomcimbi kuyoculwa ngokwezinamba ukuthi umculi ulale kuyiphi inamba kulaba abawu-30 okuyibona abafike kowamanqamu,” kusho uZimdollar.
“Laba baculi sibaqashile ukuthi babeyizimenywa ezizonandisa, abavumelekile ukuba baqokwe emncintiswaneni,” esho.
Uthe inhloso enkulu ngalo mcimbi ukuthi kuphele iminyaka eyishumi sekuhlomule abaculi abayishumi ngamaQuantum.
“UGatsheni akangeneli ngoba nyakenye kuwine yena. Wumthetho esiwubekile ukuthi osehlomulile, udedela abanye emncintiswaneni,” kusho uZimdollar.
Lo mcimbi wesekwe uKhozi FM.
