Alikaziwa usuku abayobona ngalo ilanga abasolwa ecaleni lokufa kwa-AKA

KWANDE kaZIKIZA

BANQATSHELWE ibheyili inkantolo iDurban Magistrate Court abasolwa ngokubulala umculi uKiernan “AKA” Forbes nomngani wakhe owayengusomabhizinisi nompheki ongusaziwayo uTebello “Tibz” Motsoane.

U-AKA noTibz babulawa ngokudutshulwa ngoFebruary 2023 ngaphandle kwendawo yokudla iWish esiyavalwa emgaqweni uFlorida.

Inkantolo ithe kungaba ubudedengu uma inganika abasolwa ibheyili.

Ngokophenyo lwamaphoyisa u-AKA nguye owayeqondwe ukuthi abulawe kwathi uTibz wathola amachaphazela.

Abasolwa uLindokuhle Thabani Mkhwanazi (30); Lindani Ndimande (35); Siyanda Myeza (21); Mziwethemba Gwabeni (36); noLindokuhle Ndimande (29) babekwe amacala amabili okubulala kodwa bonke bayaphika ukuthi bayabandakanyeka kuleli tulo.

Babhekene namacala okubulala, elokuzama ukubulala, ukukhwabanisa imali nelokuphatha izibhamu ezingekho emthethweni.

Ngokusho kombuso uGwabeni nguye ongungqongqondo ekwakheni leli tulo njengoba kuthiwa wafakelwa uR800 000 ngusomabhizinisi onamatekisi odumile eThekwini uMfundo Gcaba.

Kuthiwa le mali wayihlukanisa nalaba asolwa nabo ngemuva kokuphothula umsebenzi.

UGcaba akakaze abekwe icala kodwa kuthiwa usekhiphe isitatimende lapho ethi akakaze akhiphe mali ngokubulawa kuka-AKA.

Kulesi sitatimende uGcaba uveze ukuthi le mali evela kwi-akhawunti yakhe yayimayelana nomsebenzi webhizinisi awenza noGwabeni.

NgoLwesithathu iMantshi uVincent Hlatshwayo yenqabile ukunika abasolwa ibheyili.

Ngenxa yokuvela kwezindaba zokuthi abasolwa sebake bamataniswa kwamanye amacala angu-19, umbuso unqume ukubabiza ngegenge eyingozi.

Ummeli wimbuso u-Elvis Gcweka uphakamise ukuthi leli cala libekelwe usuku lomhla ka August 8.

Abasolwa basazoqhubeka nokugqunywa esitokisini eWestville Correctional Centre eThekwini ngaphambi kokukhuza ibuya enkantolo.