Umqeqeshi weBafana Bafana ushaye ngesithende umgadli weBhakabhaka osefomini
Kuthuke abalandeli ngesikhathi uBroos engamfaki uTshegofatso Mabasa kubadlali abangu-36
KWANDA kaZIKIZA
USHAYWE ngesithende umgadli we-Orlando Pirates osefomini njengoba umqeqeshi weBafana Bafana uHugo Broos engambizanga eqenjini lesikhashana elizodlala umdlalo wokuhlungela iNdebe yoMhlaba ka-2026.
Kuthuke abalandeli ngesikhathi uBroos engamfaki uTshegofatso Mabasa kubadlali abangu-36 abasazohlungwa ngaphambi kwemidlalo yeNigeria ekuhambeni noweZimbabwe ekhaya ngenyanga ezayo.
UMabasa usevalele enethini amagoli angu-15 nangasiza ukuthi iPirates iqede isizini endaweni yesibili bese iyodlala ku-CAF Champions League.
UBroos unqume ukubiza uLye Foster odlala kwiBurnely kwi-English Premier League.
UBurnely ubizwa nje, akahambanga neBafana Bafana iyodlala ku-Africa Cup of Nations ngenxa yokugula okwamhlasela.
Kodwa wabuye wasinda isigubhukane wabonakala esedlala kwiBurnley egcine ngokugencwa izembe ngesonto eledlule.
Ngesikhathi kulindeleke abizwe sekudlalwa owobungani ne-Algeria ne-Andora ezinyangeni ezimbili ezedlule, uBroos akambizanga ngoba wathi usafuna ukuba ngengxoxo ngasese nalo mdlali nomqeqeshi wakhe uVincent Kompany.
Okuqaphelekile ngeqembu layizolo ukufakwa kukazakwabo kaMabasa uRelebohile Mofokeng osehlabe umxhwele abaningi ngekhono lakhe kule sizini.
IBafana izodlala neNigeria, eLagos ngo Juni 6 bese idlala neZimbabwe eBloemfontein ngoJuni 11.
INingizimu Afrika ihlezi endaweni yesibili kuGroup C namaphuzu amathathu kanti iRwanda isiqoqe amane bese kuthi iNigeria, Lesotho neZimbabwe babe namaphuzu amabili bese kuthi iBenin iqhamuke nelilodwa.
Onozinti: Ronwen Williams (Mamelodi Sundowns), Bruce Bvuma (Kaizer Chiefs), Ricardo Goss (SuperSport United), Veli Mothwa (AmaZulu)
Izitobha: Nyiko Mobbie (Sekhukhune United), Thapelo Morena, Khulisa Mudau, Grant Kekana, Terrence Mashego, Mthobi Mvalano, Aubrey Modiba (Sundowns), Innocent Maela, Nkosinathi Sibisi, Thapelo Xoki noThabiso Monyane (Orlando Pirates), Given Msimango (Chiefs), Thabo Moloisane (Stellenbosch FC), Siyabonga Ngezana (FCSB, Romania)
Abaseswini: Teboho Mokoena noBathusi Aubaas (Sundowns, Grant Margeman (SuperSport United), Jayden Adams (Stellenbosch FC) noSphephelo Sithole (Tondela, Portugal)
Abagadli: Themba Zwane (Sundowns) Devin Titus no-Iqraam Rayners (Stellenbosch FC), Oswin Appollis (Polokwane City), Patrick Maswanganyi, Relebohile Mofokeng no-Evidence Makgopa (Pirates), Mlondi Mbanjwa noTshepang Moremi (AmaZulu), Elias Mokwana (Sekhukhune United), Lyle Foster (Burnley, England) Percy Tau (Al Ahly, Egypt) noMihlali Mayambela (Aris Limassol, Cyprus)
